ସୁରମ୍ୟ ସ୍ବର୍ଣ୍ଣମୟୀ ଲଙ୍କା

ରାମଦୂତ ମହାବୀର ହନୁମାନ ସୀତା ଠାବକରିବା ପାଇଁ ମେଘ ସଦୃଶ ଏକ ପର୍ବତ ଆକାର ରୂପ ଧରି ମହା ବେଗରେ ଶତ ଯୋଜନ ଅତିକ୍ରମ କରି ଯାଇ ସାଗରର ଅପର ପାର୍ଶ୍ୱରେ ପହଞ୍ଚି ଗଲେ l ଲଙ୍କାର ରମଣୀୟ ବନରାଜି ତାଙ୍କର ଦୃଷ୍ଟିଗୋଚର ହେଲା l ରାକ୍ଷସ ମାନଙ୍କ ସନ୍ଦେହରେ ପଡ଼ିବେ ବୋଲି ଭାବି ସେ ନିଜର ବିଶାଳ ରୂପକୁ ପରିତ୍ୟାଗ କରି ପ୍ରକୃତ ସ୍ୱରୂପକୁ ଫେରି ଆସିଲେ l କେତକୀ, ନାରୀକେଳ ଶୋଭିତ ଲମ୍ବ ନାମକ ପର୍ବତ ଉପରେ ସେ ଓହ୍ଲାଇ ଅମରାବତୀ ସଦୃଶ ସୁରମ୍ୟ ଲଙ୍କା ପୁରୀର ଶୋଭା ଦେଖି ବିସ୍ମିତ ହେଲେ l
ଉଚ୍ଚ ପାର୍ବତ୍ୟମାଳଭୂମି ଉପରେ ସ୍ଥାପିତ ଲଙ୍କା ବହୁ ରମଣୀୟ ବନ ଉପବନରେ ପୂର୍ଣ୍ଣ ଥିଲା l କରବୀର କଦମ୍ୱ, ଖର୍ଜୁର, କର୍ଣ୍ଣିିକାର, କୁଟଜ, କେତକୀ ଆଦି ପୁଷ୍ପିତ ବୃକ୍ଷମାନେ ପକ୍ଷୀମାନଙ୍କଦ୍ଵାରା ମଣ୍ଡିତହୋଇ ମୃଦୁ ମଳୟ ପବନରେ ଚାଳିତ ହେଉଥିଲେ l ହଂସ କାରଣ୍ଡବ, ପଦ୍ମ ଓ ଉତ୍ପଳ ଶୋଭିତ ବହୁ ରମଣୀୟ ସରୋବର ଉଦ୍ୟାନ ଓ କ୍ରୀଡ଼ାଭୂମି ଲଙ୍କାର ଶୋଭା ବର୍ଦ୍ଧନ କରୁଥିଲା l ଲଙ୍କାର ଚାରିପଟରେ ବହୁ ଜଳ ପୁର୍ଣ୍ଣ ପରିଖା, ଉତ୍ତୁଙ୍ଗପ୍ରାଚୀର ଭୟଙ୍କର ଧନୁର୍ଦ୍ଧାରୀ ରାକ୍ଷସ ମାନଙ୍କ ଦ୍ଵାରା ସୁରକ୍ଷିତ ହୋଇ ରହିଥିଲା l ଶତ ଶତ ସୌଧ ଏବଂ ଅଟ୍ଟାଳିକା ଶୁଭ୍ର ମେଘବର୍ଣ୍ଣ ଧାରଣ କରି, ଆକାଶକୁ ଚୁମ୍ବନ କରୁଥିଲା l ବୃକ୍ଷରୁ ପୁଷ୍ପ ମାନ ପଡ଼ି, ଲଙ୍କାର ଶୁଭ୍ର ବର୍ଣ୍ଣର ଉଚ୍ଚା ସଡ଼କ ସବୁ ପୁଷ୍ପମୟ ଦିଶୁଥିଲା l ନଗରୀର ଚତୁର୍ଦ୍ଦିଗରେ କାଞ୍ଚନମୟ ତୋରଣ ସବୁ ଶୋଭା ପାଉଥିଲା l
ହନୁମାନ ଯାଇ ଉତ୍ତରଦ୍ୱାରରେ ପହଞ୍ଚି ଚିନ୍ତାକଲେ ସମୁଦ୍ର ପରିବେଷ୍ଠିତ ଲଙ୍କାପୁରୀକୁ ଦେବତା ମାନେ ମଧ୍ୟ ଜୟ କରିପାରିବେ ନାହିଁ l ଶ୍ରୀରାମ ବା କଅଣ କରିବେ l ସେ ନିଜ ଦାୟିତ୍ୱ,ସୀତାଠାବ କଥା ମନେ ପକାଇ ଏକ କ୍ଷୁଦ୍ର ବିରାଡ଼ି ରୂପ ଧରି ଲଙ୍କାପୁରୀରେ ପ୍ରବେଶକରି ପ୍ରସାଦ ମାନଙ୍କ ସୌନ୍ଦର୍ଯ୍ୟ ଦେଖିବାକୁ ଲାଗିଲେ l ସେ ଦେଖିଲେ ସାତ ତାଲା ଆଠ ତାଲା କୋଠା ମାନଙ୍କରେ ସୁନାର ଖମ୍ଭ, ହୀରା ନୀଳାରେ ପାହାଚ ଓ ମୁକ୍ତା ଜାଲ ଦିଆ ଯାଇଥିବା ବାତାୟନ ସବୁ ଶୋଭାପାଉଛି l ସମୁଦ୍ରର ମୃଦୁ ହିଲ୍ଲୋଳ ଭାସି ଆସୁଛି l ମୟୂର ରାଜହଂସମାନଙ୍କ କଳଧ୍ଵନୀ ଶୁଣା ଯାଉଛି l କୋଠା ମାନଙ୍କରେ ସୁନ୍ଦର ପତାକାମାନ ସମୁଦ୍ରର ହିଲ୍ଲୋଳରେ ଫର ଫର ଉଡୁଛି l ବିଦ୍ୟୁତ୍ ପ୍ରଦୀପ ମାନଙ୍କ ଦ୍ଵାରା ସମସ୍ତ ରାବଣନଗରୀ ଲଙ୍କା ଆଲୋକିତ ହୋଇଛି l
ଏହା ପରେ ହନୁମାନ ଲଙ୍କାର ରକ୍ଷାକର୍ତ୍ତ୍ରୀ ଲଙ୍କିନୀ ଦେବୀଙ୍କୁ ପରାସ୍ତକରି ପ୍ରାଚୀର ଡେଇଁ ଲଙ୍କାନଗରୀ ମଧ୍ୟରେ ପ୍ରବେଶ କଲେ ଓ ଜ୍ୟୋତ୍ସ୍ନାସ୍ନାତ ରାତ୍ରୀରେ ଝରାପୁଞ୍ଜ ଶୋଭିତ ରାଜପଥ ଉପରେ ଚାଲି ଚାଲି ରମଣୀୟ ଲଙ୍କା ନଗରୀକୁ ଦେଖିବାକୁ ଲାଗିଲେ l ତୂରୀ, ଅନ୍ୟ ବାଦ୍ୟ ନାଦରେ ନଗର ଉତ୍ସବମୁଖର ଜଣା ଯାଉଥିଲା l ପଦ୍ମ ଏବଂ ସ୍ଵସ୍ତିକଚିହ୍ନ ଶୋଭିତ ଉଚ୍ଚ ସୌଧମାଳା ବିଚିତ୍ର ମାଲ୍ୟ ଓ ଅଳଙ୍କାର ଦ୍ଵାରା ଶୋଭିତଥିଲା l ସଙ୍ଗୀତର ମୂର୍ଚ୍ଛନା ଓ ନାରୀମାନଙ୍କ ନୁପୁରର ନିକ୍ୱଣ ସହ କେଉଁଠି କେଉଁଠି ବେଦଧ୍ଵନୀ ମନ୍ତ୍ର ଜପ ଶୁଣା ଯାଉଥିଲା l ସ୍ଥାନେ ସ୍ଥାନେ ଯୋଦ୍ଧା ମାନଙ୍କ ବାହୁସ୍ଫୋଟ ଓ ସିଂହନାଦ ଶୁଣା ଯାଉଥିଲା l ଭାଟ ମାନେ ରାବଣର ପ୍ରଶସ୍ତି ଗାୟନ କରୁଥିଲେ l ଧନୁ,ଖଡ୍ଗ, ଶତଘ୍ନି ଆଦି ଅସ୍ତ୍ରଶସ୍ତ୍ର ଧରି ବହୁ ରାକ୍ଷସ ଲଙ୍କା ନଗରୀକୁ ରକ୍ଷା କରୁଥଲେ l ସେ ପ୍ରାସାଦରେ ଅନେକ ଅନିନ୍ଦ୍ୟ ସୁନ୍ଦରୀ ନାରୀ ମାନଙ୍କୁ ଦେଖିବାକୁ ପାଇଲେ l ସୁନ୍ଦରୀ ଲଳନା ଗଣ ସେମାନଙ୍କ ସ୍ବାମୀ ମାନଙ୍କ ସହ କ୍ରୀଡ଼ାରତ ଥିଲେ l
ହନୁମାନ କ୍ଷୀପ୍ର ଗତିରେ ବିଭିନ୍ନ ଗୃହ ପ୍ରସାଦ ମଧ୍ୟ ଦେଇ ସୀତାଙ୍କୁ ଖୋଜି ବୁଲୁଥାନ୍ତି, ଏହି ସମୟରେ ସେ ଏକ ସୁବର୍ଣ୍ଣ ପାଚେରୀ ଘେରା ପ୍ରସାଦ ମଧ୍ୟରେ ପ୍ରବେଶକଲେ l ଅଶ୍ୱାରୋହୀ ଓ ଗଜାରୋହୀ ବୀର ମାନେ ଏହାକୁ ପହରାଦେଉଥାନ୍ତି l ଏହାର ତୋରଣ ସବୁ ରୌପ୍ୟ ନିର୍ମିତ ଓ ସୁବର୍ଣ୍ଣ ଖଚିତ ଥିଲା l ଲଙ୍କା ନଗରୀର ଅଳଙ୍କାରସ୍ୱରୂପ ସେହି ପ୍ରସାଦ ରାବଣର ପ୍ରସାଦ ଥିଲା l ହନୁମାନ ସେହି ପ୍ରସାଦମଧ୍ୟରେ ବହୁ ପ୍ରମୋଦ ଏବଂ ବିହାର ଗୃହମାନ ଦେଖିଲେ l ସେହି ଗୃହ ମାନଙ୍କ ଅପୁର୍ବ ସାଜସଜ୍ଜା ତାଙ୍କୁ ଖୁବ୍ ଚମତ୍କୃତ କଲା l ସେଠାରେ ସେ ସ୍ୱର୍ଣ୍ଣ, ରୌପ୍ୟ, ବୈଦୂର୍ଯ୍ୟ ଓ ପ୍ରବାଳ ନିର୍ମିତ ରାବଣର ପୁଷ୍ପକ ବିମାନ ଦର୍ଶନକରି ବିସ୍ମିତ ହେଲେ l ସେହିଠାରେ ହନୁମାନ ନିଶାର୍ଦ୍ଧରେ ରାବଣକୁ ସୁପ୍ତାବସ୍ଥାରେ ଦେଖିଲେ l ସେ ହସ୍ତୀଦନ୍ତ ଓ ସୁବର୍ଣ୍ଣ ପାଦଯୁକ୍ତ ବୈଦୂର୍ଯ୍ୟ ନିର୍ମିତ ଏକ ପଲ୍ୟଙ୍କ ଉପରେ ବରାଙ୍ଗନାଙ୍କ ସହ ଶୋଇଥିଲା l ହନୁମାନ ସେମାନଙ୍କ ମଧ୍ୟରେ ଏକ ହେମାଙ୍ଗୀ ସୁନ୍ଦରୀ ନାରୀ ଶୋଇ ଥିବାର ଦେଖି, ସୀତାଙ୍କୁ ପାଇଗଲେ ବୋଲି ଭାବି ଆନନ୍ଦିତହେଲେ l କିନ୍ତୁ ପର ମୁହୂର୍ତ୍ତରେ ଏହା ତାଙ୍କର ଭ୍ରମ ବୋଲି ଜାଣି ଦୁଃଖିତ ହେଲେ l ସେହି ନାରୀ ଥିଲେ ରାବଣ ପଟ୍ଟମହିଷି ମନ୍ଦୋଦରୀ l
ଏହା ହିଁ ବାଲ୍ମୀକି ରାମାୟଣ ମନୋହର ବର୍ଣ୍ଣନାରେ ରାବଣପୁରୀ ସ୍ଵର୍ଣ୍ଣମୟୀ ଲଙ୍କା l ହନୁମାନଙ୍କ ଲଙ୍କା ଦର୍ଶନକୁ ବାଲ୍ମୀକି ବର୍ଣ୍ଣନା କରିଛନ୍ତି :-
ଶଙ୍ଖପ୍ରଭଂ କ୍ଷୀର ମୃଣାଳବର୍ଣ୍ଣ
ମୁଦ୍ରଚ୍ଚମାନ ବ୍ୟଭଭାସ ମାନଂ l
ଦଦର୍ଶ ଚନ୍ଦ୍ରଂ ସ କପିପ୍ରବୀରଃ
ପୋପ୍ଲୁୟମାନଂ ସରସୀଜ ହଂସମ୍ ll
ଲଙ୍କା ନଗରୀ ନିର୍ମାଣ ବିଷୟରେ ଦୁଇଟି କାହାଣୀ ଦେଖା ଯାଏ l ପ୍ରଥମ କାହାଣୀ ଅନୁସାରେ ଥରେ ମାଆ ପାର୍ବତୀ ଭଗବାନ ଶଙ୍କରଙ୍କୁ କହିଲେ, ଆଉ ଏ କୈଳାସ ପୁରୀ ଭଲ ଲାଗୁନାହିଁ l ଆମ ନିବାସ ପାଇଁ ତୁମେ ଅନ୍ୟ ଏକ ନଗର ନିର୍ମାଣ କର l ଶିବ ବିଶ୍ଵକର୍ମାଙ୍କୁ ଡକାଇ ଲଙ୍କା ନଗରୀ ନିର୍ମାଣ କଲେ l ନଗରୀର ପ୍ରତିଷ୍ଠା ପାଇଁ ସେ ବ୍ରହ୍ମଜ୍ଞାନୀ ରାବଣକୁ ପୁରୋହିତ ବରଣ କଲେ l ପରେ ରାବଣ ଦକ୍ଷିଣା ସ୍ୱରୂପେ ଶିବଙ୍କ ଠାରୁ ଲଙ୍କାକୁ ମାଗି ନେଲା l
ଅନ୍ୟ ଏକ କାହାଣୀରୁ ଜଣା ପଡ଼େ, ଲଙ୍କା ପ୍ରଥମେ ଧନପତି କୁବେରଙ୍କ ନଗରୀ ଥିଲା l ତାଙ୍କୁ ଯୁଦ୍ଧରେ ପରାଜିତ କରି ରାବଣ ତାଙ୍କଠାରୁ ଲଙ୍କାନଗରୀ ଓ ପୁଷ୍ପକ ବିମାନ ଛଡ଼ାଇ ଆଣିଥିଲା l କୁବେର ଥିଲେ ବିଶ୍ରବାନନ୍ଦନ ରାବଣର ବୈମାତୁର ଭ୍ରାତା l
🙏🙏🙏
ଅର୍ଜୁନୀ
———–
ଅର୍ଜୁନୀ ଚରଣ ବେହେରା
ମୋ -୭୬୯୩୦୯୧୯୭୧