ବକ୍ରତୁଣ୍ଡଙ୍କ ଅଙ୍ଗ ପ୍ରତ୍ୟଙ୍ଗରୁ ଶିକ୍ଷା

ଗଜାନନ ପାର୍ବତୀନନ୍ଦନ ଗଣେଶଙ୍କ ବିଚିତ୍ର ରୂପ ବୃହତ ଉଦର, କୁଲା ଭଳି କାନ, ଗଜ ବଦନରେ ଛୋଟ ଛୋଟ ଆଖି,ଉନ୍ନତ କପାଳ,ଶୁଣ୍ଢ ନାସିକା କ୍ଷୁଦ୍ର ମୂଷିକ ବାହନ ଇତ୍ୟାଦିରୁ ଆମକୁ ଭିନ୍ନ ଭିନ୍ନ ଶିକ୍ଷା ମିଳିଥାଏ l ସେ ବିଷୟରେ ଗୋଟିଏ ଛୋଟ ଆଲୋଚନା l
ମୁଣ୍ଡ: –
ଗଣେଶଙ୍କ ବିଶାଳ ଗଜ ମୁଣ୍ଡରୁ ଆମେ କଠିନରୁ କଠିନତମ ପରିସ୍ଥିତିକୁ ସାମ୍ନା କରିବା ଓ ନେତୃତ୍ୱ ନେବା ଶିକ୍ଷା କରିଥାଉଁ l ତାଙ୍କର ଉନ୍ନତ କପାଳ ଆମକୁ ଉଦାର ରହିବା ସହିତ ଧନ, ଶକ୍ତି ଆଦିର ଅର୍ଜନ ପାଇଁ, ଅନ୍ୟକୁ ପୀଡ଼ା ଦେବା ଉଚିତ ନୁହଁ ବୋଲି ଶିକ୍ଷା ଦେଇଥାଏ l ଏହା ମଧ୍ୟ ଶିକ୍ଷା ଦେଇ ଥାଏ ସର୍ବଦା ଚିନ୍ତାଶୀଳ ରୁହ l ନୂଆ ନୂଆ ବିଚାର ମାନ ଚିନ୍ତନ ଓ ମନନ କର l
ଆଖି:-
ଗଣେଶଙ୍କ ଛୋଟ ଆଖି ଧ୍ୟାନପୂର୍ବକ ନୀରିକ୍ଷଣ ଓ ଦୂରଦୃଷ୍ଟି ରଖିବାର ଶିକ୍ଷା ପ୍ରଦାନ କରେ l ନିଜକୁ ସର୍ବଦା ଅନ୍ୟଠାରୁ ଛୋଟ ମଣିବା ଅର୍ଥାତ ବିନୟ ଭାବର ଶିକ୍ଷା ମଧ୍ୟ ଏହା ଦେଇଥାଏ l ଏହା କହି ଥାଏ ପ୍ରତ୍ୟେକଟି ଜିନିଷକୁ ଭଲ ଭାବେ ପରଖ, ବୁଝ ଏବଂ ତା’ ପରେ ନିର୍ଣ୍ଣୟ ନିଅ l
କାନ:-
ଗଣେଶଙ୍କ ବଡ଼ ବଡ଼ କାନ ଆମକୁ ଅନ୍ୟ ମାନଙ୍କ କଥାକୁ ଠିକ୍ ଭାବେ ଶୁଣିବାର ବାର୍ତ୍ତା ଦିଏ l ବଡ଼ କାନର ଅର୍ଥ ହେଉଛି ଅଧିକ କଥା ନକହି ଅଧିକ ଶୁଣି ଭଲ କଥା ଗ୍ରହଣ କର l
ଶୁଣ୍ଢ:-
ଵକ୍ରତୁଣ୍ଡଙ୍କ ଲମ୍ବା ଶୁଣ୍ଢ ବା ନାଶିକା ଆମକୁ ଶିକ୍ଷା ଦିଏ ମାନ ସମ୍ମାନ ହାସଲ କରିବା ପାଇଁ ପ୍ରତିଦିନ ସକ୍ରିୟ ରହି ବଡ଼ ବଡ଼ କାର୍ଯ୍ୟ କରିବାକୁ ପଡ଼ିବ l ଏହା ମଧ୍ୟ ଶୁଦ୍ଧଆଘ୍ରାଣ କର ବା ଶୁଦ୍ଧତତ୍ତ୍ୱ ଗୁଡ଼ିକୁ ଗ୍ରହଣ କରିବାର ଶିକ୍ଷା ଦେଇଥାଏ l
ଦାନ୍ତ: –
ହାତୀର ଖାଇବାଦାନ୍ତ ଓ ଦେଖାଇବାଦାନ୍ତ ଅଲଗା ଅଲଗା ଥାଏ l ଗଣେଶଙ୍କ ଦାନ୍ତ ଆମକୁ ଏ ଶିକ୍ଷା ଦେଇଥାଏ ଯେ ଆମେ ଆମ ଆଖ ପାଖରେ ଥିବା ଶତ୍ରୁଙ୍କୁ ଜାଣିବା ପରେ ବି ତାଙ୍କ ସହ ନମ୍ର ଭାବେ ବ୍ୟବହାର କରିବା ଉଚିତ lଶତ୍ରୁତା ଆଚରଣ କରି ଶତ୍ରୁତା ବଢ଼ାଇବା ଅନୁଚିତ l
ପେଟ:-
ଲମ୍ବୋଦରଙ୍କ ଥନ୍ତଲ ପେଟ ଆମକୁ ସବୁ ପ୍ରକାର ଉଚିତ ଏବଂ ଅନୁଚିତ କଥାକୁ ଉଦରସ୍ଥ କରିବାର ସନ୍ଦେଶ ଦେଇଥାଏ l ଯଦି କେହି ଆମ ଉପରେ ବିଶ୍ୱାସ କରି କଛି କହିଛନ୍ତି ତେବେ ତାକୁ ଆମେ ଅନ୍ୟକୁ ନକହି ପେଟ ଭିତରେ ସୀମିତ ରଖିବା l ଏହା ଆହୁରି ଶିକ୍ଷା ଦେଇ ଥାଏ ଅଧିକରୁ ଅଧିକ ଜ୍ଞାନ ହଜମ କର ବା ଉଦରସ୍ଥ କର l
ବାହନ ମୂଷା:-
ଇନ୍ଦୁରବାହନଙ୍କ କ୍ଷୁଦ୍ର ମୂଷିକ ସନ୍ଦେଶ ଦେଇଥାଏ କର୍ତ୍ତବ୍ୟରୂପୀ ଜୀବନରେ ଏ ଛୋଟ ମୂଷା ଆମକୁ ଅନେକ କ୍ଷତି ପହଞ୍ଚାଇ ଥାଏ l ତେଣୁ ସେ କ୍ଷତିକୁ ଦମନ କରିବା ଉଚିତ l କ୍ଷତି କାରକ ଶକ୍ତି ଗୁଡ଼ିକୁ ସର୍ବଦା ତଳେ ରଖ l ଏହା ପୁଣି ଶିକ୍ଷା ଦିଏ ବଡ଼ କାର୍ଯ୍ୟକୁ ଛୋଟ ଛୋଟ କାର୍ଯ୍ୟରୁ ଆରମ୍ଭ କର l
ନମଃ ଗଣେଶ ବିଘ୍ନେଶ୍ୱର l
ଗଜ ବଦନ ଲମ୍ବୋଦର ll