ତାମିଲନାଡୁରେ ବିଜୟ ରାଜ୍:ପ୍ରଥମ ଅଣ-ଦ୍ରାବିଡ ମୁଖ୍ୟମନ୍ତ୍ରୀ ଭାବେ ନେଲେ ଶପଥ

ଚେନ୍ନଇ : ଆଜି ତାମିଲନାଡୁରେ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ବିଜୟ। ଦୀର୍ଘ ୫୯ ବର୍ଷ ପରେ ତାମିଲନାଡୁରେ ଜଣେ ଅଣ-ଦ୍ରାବିଡ ମୁଖ୍ୟମନ୍ତ୍ରୀ ପଦ ଅଳଙ୍କୃତ କରିଛନ୍ତି। ଚେନ୍ନାଇର ଜବାହରଲାଲ ନେହେରୁ ଇନଡୋର ଷ୍ଟାଡିୟମରେ ଏହି ସମାରୋହ ଅନୁଷ୍ଠିତ ହୋଇଛି। ଏହି ଐତିହାସିକ କାର୍ଯ୍ୟକ୍ରମରେ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ସମେତ ଦେଶର ଅନେକ ପ୍ରମୁଖ ନେତା ଉପସ୍ଥିତ ରହିଛନ୍ତି। ଷ୍ଟାଡିୟମରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ୨୩୪ ଆସନ ବିଶିଷ୍ଟ ବିଧାନସଭାରେ ଟିଭିକେ ୧୦୮ ଆସନ ଜିତିଥିଲା। ଯଦିଓ ଏହା ୧୧୮ ସଦସ୍ୟ ବିଶିଷ୍ଟ ବହୁମତ ଠାରୁ କମ୍ ଥିଲା, ବିଜୟ ସରକାର ଗଠନ କରିବା ପାଇଁ ଅନ୍ୟ ଦଳର ସମର୍ଥନ ପାଇଥିଲେ। କଂଗ୍ରେସ ଦଳ, ଏହାର ପାଞ୍ଚ ବିଧାୟକଙ୍କ ସହିତ, ନିଃସର୍ତ୍ତ ସମର୍ଥନ ପ୍ରଦାନ କରିଥିଲା। ଏହା ବ୍ୟତୀତ, ସିପିଆଇ ଏବଂ ସିପିଆଇ(ଏମ୍)ର ଚାରି ଜଣ ବିଧାୟକ, ଭିସିକେର ଦୁଇଜଣ ଏବଂ ଆଇୟୁଏମଏଲର ଦୁଇଜଣ ବିଧାୟକ ମଧ୍ୟ ସେମାନଙ୍କର ସମର୍ଥନ ପତ୍ର ଦାଖଲ କରିଥିଲେ। ଏହାକୁ ଆଧାର କରି ବିଜୟ ଶୁକ୍ରବାର ରାଜ୍ୟପାଳଙ୍କୁ ଭେଟିଥିଲେ। ତେବେ ଭିସିକେର ଦୁଇ ବିଧାୟକଙ୍କ ସମର୍ଥନ ପତ୍ର ମିଳିନଥିବାରୁ ପୁଣି ଅନିଶ୍ଚିତତା ଦେଖାଦେଇଥିଲା। ଫଳରେ ରାଜ୍ୟପାଳ ବିଜୟଙ୍କ ସରକାର ଗଠନ ଦାବିକୁ ସ୍ବୀକୃତି ଦେଇନଥିଲେ। ଶନିବାର ଭିସିକେ ଓ ମୁସଲିମ୍‌ ଲିଗ୍‌ ବିଜୟଙ୍କୁ ସମର୍ଥନ ଜଣାଇବେ ବୋଲି ଲିଖିତ ପ୍ରତିଶ୍ରୁତି ଦେବାପରେ ବିଜୟ ପୁଣି ରାଜ୍ୟପାଳଙ୍କୁ ଭେଟିଥିଲେ