ବାଲେଶ୍ୱର, ୧୨ ଅକ୍ଟୋବର (କୃଷ୍ଣ କୁମାର ମହାନ୍ତି): ଅନ୍ତର୍ଜାତୀୟ ପ୍ରକୃତି ସଂରକ୍ଷଣ ସଂଘ (ଆଇୟୁସିଏନ୍)ର ବିଶେଷଜ୍ଞ ତଥା ନାଟନୋଭ୍ ବାୟୋସାଇନ୍ସ ପ୍ରାଇଭେଟ୍ ଲିମିଟେଡ୍ ସହ ସଂପୃକ୍ତ ଡ. ସିଦ୍ଧାର୍ଥ ପତିଙ୍କ ନାମ ୨୦୨୬ ମସିହାର ଏକ ବୈଜ୍ଞାନିକ ରାଙ୍କିଂ ପ୍ରୋଫାଇଲ୍ରେ ସ୍ଥାନ ପାଇଛି। ଟପ୍ସାଇନେଟ୍/ଟପ୍ରିସର୍ଚର୍ସଲିଷ୍ଟ
ଉକ୍ତ ମଞ୍ଚରେ ପ୍ରଦର୍ଶିତ ତଥ୍ୟ ଅନୁଯାୟୀ, ଡ. ପତିଙ୍କ ବିଶ୍ୱସ୍ତରୀୟ ରାଙ୍କ ୨୩୦,୭୪୭ ଏବଂ ଅଣୁଜୀବ ବିଜ୍ଞାନ ଉପକ୍ଷେତ୍ରରେ ରାଙ୍କ୍ ୪,୪୪୧ ରହିଛି। ତାଙ୍କର ଏଚ୍-ଇଣ୍ଡେକ୍ସ ୨୦ ବୋଲି ଦର୍ଶାଯାଇଛି। ଜୈବ-ଚିକିତ୍ସା ଗବେଷଣାକୁ ତାଙ୍କର ପ୍ରମୁଖ ଗବେଷଣା କ୍ଷେତ୍ର ଭାବେ ଉଲ୍ଲେଖ କରାଯାଇଛି। ତେବେ ଏହି ପ୍ରୋଫାଇଲ୍ର ଷ୍ଟାନଫୋର୍ଡ ବିଶ୍ୱବିଦ୍ୟାଳୟ ଓ ଏଲ୍ସେଭିୟର୍ ପକ୍ଷରୁ ପ୍ରକାଶିତ ମୂଳ ‘ଶ୍ରେଷ୍ଠ ୨ ପ୍ରତିଶତ ବୈଜ୍ଞାନିକ’ ତଥ୍ୟଭଣ୍ଡାର ସହ ସମ୍ପର୍କ ସ୍ୱତନ୍ତ୍ର ଭାବେ ଯାଞ୍ଚ କରାଯିବା ଆବଶ୍ୟକ।
ଡ. ପତି ୨୦୧୯ ମସିହାରେ ବାଲେଶ୍ୱରସ୍ଥିତ ଫକୀର ମୋହନ ବିଶ୍ୱବିଦ୍ୟାଳୟରୁ ଜୈବ ପ୍ରଯୁକ୍ତିବିଦ୍ୟାରେ ପିଏଚ୍ଡି ଡିଗ୍ରୀ ହାସଲ କରିଥିଲେ। ତାଙ୍କ ଗବେଷଣା କାର୍ଯ୍ୟ ପାଇଁ ଭାରତ ସରକାରଙ୍କ ପରମାଣୁ ବିଜ୍ଞାନ ଗବେଷଣା ବୋର୍ଡ (ବିଆର୍ଏନ୍ଏସ୍) ପକ୍ଷରୁ ଫେଲୋସିପ୍ ପ୍ରଦାନ କରାଯାଇଥିଲା। ପରବର୍ତ୍ତୀ ସମୟରେ ସେ ମାଲେସିଆର ୟୁନିଭର୍ସିଟି ମାଲେସିଆ ତେରେଙ୍ଗାନୁରେ ପୋଷ୍ଟଡକ୍ଟରାଲ୍ ଗବେଷଣା କରିଥିଲେ।
ସାମୁଦ୍ରିକ ଜୈବ ପ୍ରଯୁକ୍ତିବିଦ୍ୟା, ଅଣୁଜୀବ ବିଜ୍ଞାନ, ପ୍ରାକୃତିକ ଉତ୍ପାଦ, ଖାଦ୍ୟ ବିଜ୍ଞାନ, ଜୈବ-ପଲିମର୍ ଏବଂ ଜୈବ ବିବିଧତା ସଂରକ୍ଷଣ ତାଙ୍କର ପ୍ରମୁଖ ଗବେଷଣା କ୍ଷେତ୍ର। ତାଙ୍କର ଉଲ୍ଲେଖନୀୟ ସମ୍ମାନ ମଧ୍ୟରେ ଓଡ଼ିଶା ସରକାରଙ୍କ ବିଜୁ ପଟ୍ଟନାୟକ ବନ୍ୟଜନ୍ତୁ ସଂରକ୍ଷଣ ପୁରସ୍କାର, ଇଣ୍ଡୋନେସିଆର ଉଦୟନ ବିଶ୍ୱବିଦ୍ୟାଳୟ ସହ ସମ୍ପୃକ୍ତ ୟୁନିସର୍ଫ ପୁରସ୍କାର ଏବଂ ବ୍ରିଟେନ୍ର କନ୍ଜରଭେସନ୍ ଲିଡରସିପ୍ ପ୍ରୋଗ୍ରାମ୍ ପକ୍ଷରୁ ପ୍ରଦତ୍ତ ସିଏଲ୍ପି ଫ୍ୟୁଚର୍ କନ୍ଜରଭେସନିଷ୍ଟ ପୁରସ୍କାର ଅନ୍ତର୍ଭୁକ୍ତ ବୋଲି ଉଲ୍ଲେଖ ରହିଛି।
ବୈଜ୍ଞାନିକ ଗବେଷଣା ଓ ସଂରକ୍ଷଣ ସମ୍ପର୍କିତ କାର୍ଯ୍ୟ ମାଧ୍ୟମରେ ଡ. ପତି ଜୈବ ପ୍ରଯୁକ୍ତିବିଦ୍ୟାରେ ନବସୃଜନ, ପରିବେଶଗତ ସ୍ଥିରତା ଏବଂ ଜୈବ ବିବିଧତାର ସୁରକ୍ଷା ଭଳି କ୍ଷେତ୍ର ସହ ଜଡ଼ିତ ରହିଛନ୍ତି।
ତାଙ୍କର ଶିକ୍ଷାଗତ ଉପଲବ୍ଧି ଓ ଅନ୍ତର୍ଜାତୀୟ ଗବେଷଣା ଅଭିଜ୍ଞତା ବୈଜ୍ଞାନିକ ଜ୍ଞାନର ଅଗ୍ରଗତିରେ ଓଡ଼ିଶାର ଗବେଷକମାନଙ୍କ ଭୂମିକାକୁ ଉଜାଗର କରିବା ସହ ଜୈବ ପ୍ରଯୁକ୍ତିବିଦ୍ୟା, ଶିଳ୍ପ ଓ ପରିବେଶ ସଂରକ୍ଷଣ ମଧ୍ୟରେ ସମନ୍ୱୟର ବର୍ଦ୍ଧିତ ସମ୍ଭାବନାକୁ ପ୍ରତିଫଳିତ କରୁଛି।
