ଗଜପତି,୪.୯(ମନୋଜ ପାଢ଼ୀ) :-ଗଜପତି ଜିଲ୍ଲା କାଶୀନଗର ଥାନା ପୁଲିସ ବନଜାତ ଦ୍ରବ୍ୟ ଚାଲାଣ ବିରୋଧରେ କାର୍ଯ୍ୟାନୁଷ୍ଠାନ ନେଇ ପ୍ରାୟ ୧୦୫ କିଲୋ ଚନ୍ଦନ କାଠ ଜବତ କରିବା ସହ ଏହି ଘଟଣାରେ ୩ ଜଣଙ୍କୁ ଗିରଫ କରିଛି। ଜବତ ଚନ୍ଦନ କାଠ, ଅଟୋରିକ୍ସା, ମୋବାଇଲ୍ ଫୋନ୍ ଓ ନଗଦ ଟଙ୍କା ସମେତ ମୋଟ ସମ୍ପତ୍ତିର ଆନୁମାନିକ ମୂଲ୍ୟ ପ୍ରାୟ ୧୦ ଲକ୍ଷ ଟଙ୍କା ବୋଲି ପୁଲିସ ପକ୍ଷରୁ କୁହାଯାଇଛି।ପୁଲିସ ସୂଚନା ଅନୁସାରେ, ଗୁରୁବାର ସକାଳ ପ୍ରାୟ ୫ଟା ୩୦ ସମୟରେ କାଶୀନଗର ଥାନା ପୁଲିସ ଏସ୍ଏଚ୍-୪ ପାରଳାଖେମୁଣ୍ଡି – ଗୁଣୁପୁର ରାସ୍ତାରେ ପାଟ୍ରୋଲିଂ କରୁଥିବା ସମୟରେ ଏକ ଅଟୋ-ରିକ୍ସାରେ ସନ୍ଦିଗ୍ଧ ବନଜାତ ଦ୍ରବ୍ୟ ଚାଲାଣ ହେଉଥିବା ନେଇ ପୁଲିସକୁ ବିଶ୍ୱସ୍ତ ସୂତ୍ରରୁ ସୂଚନା ମିଳିଥିଲା।ସୂଚନା ଆଧାରରେ ପୁଲିସ ଦଳ ଖାରଡା ଗ୍ରାମ ନିକଟରେ ପହଞ୍ଚି ସନ୍ଦିଗ୍ଧ ଅଟୋ-ରିକ୍ସାକୁ ଅଟକାଇବାକୁ ସଙ୍କେତ ଦେଇଥିଲା। ତେବେ ପୁଲିସ ଗାଡ଼ିକୁ ଦେଖି ଅଟୋ ଚାଳକ ଦ୍ରୁତ ଗତିରେ ଗାଡ଼ି ଚଳାଇ ପଳାଇବାକୁ ଚେଷ୍ଟା କରିଥିଲା। ପୁଲିସ ପ୍ରାୟ ୫୦୦ ମିଟର ପିଛା କରି ଖାରଡା ଛକ ନିକଟରେ ଅଟୋକୁ ଅଟକାଇ ତଲାସି ସମୟରେ ଅଟୋରୁ ୫ଟି ବସ୍ତାରେ ପ୍ୟାକ୍ ହୋଇଥିବା ପ୍ରାୟ ୧୦୫ କିଲୋ ଚନ୍ଦନ କାଠ ଜବତ ହୋଇଥିଲା। ଏହା ସହିତ ପଞ୍ଜିକରଣ ନମ୍ବର ଓଡି-୦୫-ଏମ-୦୭୮୭ ଥିବା ଅଟୋ-ରିକ୍ସା, ୩ଟି ମୋବାଇଲ୍ ଫୋନ୍ ଏବଂ ନଗଦ ୪ ହଜାର ଟଙ୍କା ମଧ୍ୟ ପୁଲିସ ଜବତ କରିଥିବା ସୂଚନା ପ୍ରଦାନ କରାଯାଇଛି।ଏହି ଘଟଣାରେ ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଅନ୍ତର୍ଗତ କୁସୁମି ଗ୍ରାମର ସିରାଜ ଖାନ ଓ ଆକ୍ରମ ଖାନ ଏବଂ ଗଜପତି ଜିଲ୍ଲା ରାମଗିରି ଥାନା ଅନ୍ତର୍ଗତ ସାନସଡା ଗ୍ରାମର ଦାମୋଦର ପ୍ରଧାନଙ୍କୁ ପୁଲିସ ଗିରଫ କରିଛି।
ଏନେଇ କାଶୀନଗର ଥାନାରେ ମାମଲା ନଂ. ୧୬୯/୦୩.୦୯.୨୦୨୬ ରୁଜୁ ହୋଇଛି। ଭାରତୀୟ ନ୍ୟାୟ ସଂହିତାର ଧାରା ୩୦୩(୨)/୧୧୨/୩(୫) ସହିତ ଓଡ଼ିଶା ବନ ଆଇନ, ୧୯୭୨ର ଧାରା ୫୫-ଇ ଏବଂ ଓଡ଼ିଶା କାଠ ଓ ଅନ୍ୟାନ୍ୟ ଜଙ୍ଗଲ ଉତ୍ପାଦ ପରିବହନ ନିୟମ, ୧୯୮୦ର ନିୟମ ୨୧ ଅନୁଯାୟୀ ମାମଲା ରୁଜୁ କରାଯାଇଛି।ମାମଲାର ତଦନ୍ତକାରୀ ଅଧିକାରୀ ଭାବେ ଏସ୍ଆଇ ପଞ୍ଚାନନ ବେହେରା ତଦନ୍ତ ଜାରି ରଖିଛନ୍ତି। ଚନ୍ଦନ କାଠ ଚାଲାଣ ସହ ଜଡ଼ିତ ଅନ୍ୟ ବ୍ୟକ୍ତିଙ୍କ ସମ୍ପର୍କରେ ମଧ୍ୟ ତଦନ୍ତ କରାଯାଉଥିବା ପୁଲିସ ପକ୍ଷରୁ ଜଣାପଡ଼ିଛି।
