କଟକରେ ଏଫଏମ୍ ମେଡିକାଲ କଲେଜର ଏମବିବିଏସ୍ ଛାତ୍ରୀ ଚନ୍ଦ୍ରିକା ହେମ୍ବ୍ରମଙ୍କ ରହସ୍ୟଜନକ ମୃତ୍ୟୁ ଘଟଣା ନୂଆ ମୋଡ଼ ନେଇଛି।

କାନ୍ଦି କାନ୍ଦି ଭାଙ୍ଗି ପଡୁଛି ମାଆ, ଅଭାବନୀୟ ପରିସ୍ଥିତି ଆଉ ଅବେଳରେ ଚାଲିଯିବାର ଦୁଃଖରେ ମିୟମ୍ରାଣ ସମ୍ପର୍କୀୟ। ମେଡିକାଲ ପଢୁଥିବା ଝିଅକୁ ହରାଇ ବୁଝୁନି ମନ, ବୋଲ ମାନୁନି ଆଖିର ଲୁହ।…ମୟୂରଭଞ୍ଜ ଉଦଳା ରାଇଦାଣ୍ଡିଆ ଗାଁରେ ଆଜି ସକାଳୁ ଝିଅର ମୃତଦେହ ପହଞ୍ଚିବା ସୃଷ୍ଟି ହୋଇଥିଲା ଏମିତି ଶୋକାକୂଳ ପରିସ୍ଥିତି। ଘର ଅଗଣାରେ ସବୁ ଦିନ ପାଇଁ ଶୋଇଥିଲା ଚନ୍ଦ୍ରିକା। ଆଉ ଏପଟେ କାନ୍ଦ ବୋବାଳିରେ ଫାଟି ପଡୁଥିଲା ପରିବେଶ। ତାରି ଭିତରେ ଚନ୍ଦ୍ରିକାଙ୍କ ପରିବାରର ସେଇ ଗୋଟିଏ ଅଭିଯୋଗ ଯେ, ତାଙ୍କ ଝିଅକୁ ହତ୍ୟା କରିଛି ପ୍ରେମିକ ଭୀମସେନ ପ୍ରସାଦ ଟୁଡୁ। ଆଉ ହତ୍ୟା ପଛରେ ରହିଛି ତ୍ରୀକୋଣୀୟ ପ୍ରେମ କାହାଣୀ। ଚନ୍ଦ୍ରିକାଙ୍କ ମାଆଙ୍କ ଅଭିଯୋଗ କରିଛନ୍ତି, ଝିଅ ସହ ଦୀର୍ଘ ବର୍ଷରୁ ପ୍ରେମ ସମ୍ପର୍କରେ ଥିଲେ ଓଏଏସ୍ ଅଫିସର ଭୀମସେନ ପ୍ରସାଦ ଟୁଡୁ। ଏମିତିକି ଆସନ୍ତା ୨୦୨୭ ଡିସେମ୍ବରରେ ଚନ୍ଦ୍ରିକାଙ୍କୁ ସେ ବିବାହ କରିବାର ପ୍ରତିଶ୍ରୁତି ବି ଦେଇଥିଲେ। କିନ୍ତୁ ଭୀମସେନଙ୍କର ଆଉ ଜଣେ ଯୁବତୀଙ୍କ ସହ ସମ୍ପର୍କରେ ଆସିବା ପରେ ଚନ୍ଦ୍ରିକାଙ୍କୁ ସେ ରୀତିମତ ମାନସିକ ନିର୍ଯାତନା ଦେଇଆସୁଥିଲେ। ଆଉ ଦୁଇ ଜଣ ମିଶି, ତାଙ୍କୁ ହତ୍ୟା କରିଥିବା ସଙ୍ଗୀନ ଅଭିଯୋଗ କରିଛନ୍ତି ଚନ୍ଦ୍ରିକାଙ୍କ ମାଆ ଓ ଭାଇ।

ବାଲେଶ୍ୱର ଫକୀର ମୋହନ ମେଡିକାଲ କଲେଜର ଏମବିବିଏସ ତୃତୀୟ ବର୍ଷ ଛାତ୍ରୀ ଚନ୍ଦ୍ରିକା ହେମ୍ବ୍ରମଙ୍କର ମୃତଦେହ ଗୁରୁବାର ସକାଳେ ସନ୍ଦେହଜନକ ଭାବେ କଟକ ତ୍ରିଶୁଳିଆ ସ୍ଥିତ କାଠଯୋଡି ପୋଲ ତଳୁ ଉଦ୍ଧାର ହୋଇଥିଲା। ମାତ୍ର ଗୋଟିଏ ଫୁଟ ପାଣି ଭିତରେ ପଡ଼ି ରହିଥିଲା ତାଙ୍କ ମରଶରୀର। ସ୍ଥାନୀୟ ଲୋକେ ପୋଲିସକୁ ଖବର ଦେବା ପରେ ଅଗ୍ନିଶମ ବାହିନୀ ଜରିଆରେ ମୃତଦେହ ଉଦ୍ଧାର କରିଥିଲା ବାରଙ୍ଗ ପୋଲିସ। ଏପଟେ ବ୍ରିଜ୍ ଉପରୁ ଏକ ବ୍ୟାଗ୍ ଓ ଚପଲ ବି ଉଦ୍ଧାର କରିଥିଲା ପୋଲିସ। ପରେ ଅନୁସନ୍ଧାନରୁ ଜଣାପଡ଼ିିଥିଲା ଯେ, ମୃତ ଯୁବତୀଙ୍କ ଘର ମୟୂରଭଞ୍ଜ ଉଦଳାରେ। ଘର ଲୋକଙ୍କୁ ଡାକିବା ପରେ, ତାଙ୍କୁ ଝିଅକୁ ହତ୍ୟା କରାଯାଇଥିବା ପୋଲିସ ଆଗରେ ଅଭିଯୋଗ ଆଣିଥିଲେ ପରିବାର ଲୋକେ। ଏପଟେ କଟକ ଡିସିପି କହିଛନ୍ତି, ଯୁବତୀଙ୍କ ଶରୀରରେ କ୍ଷତ କି ଆଘାତ ଚିହ୍ନ ନାହିଁ। ଶବ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା କରାଯାଇଛି। ପରିବାର ଲୋକଙ୍କ ଅଭିଯୋଗ ଅନୁସାରେ ତାଙ୍କ ମୋବାଇଲ ଫୋନ୍ ଓ ଅନ୍ୟ ସୋସିଆଲ ମିଡ଼ିଆ ଚାଟିଂର ଯାଂଚ୍ କରାଯାଉଛି। ଭୀମସେନ ଟୁଡୁ ଆଙ୍ଗେଲର ବି ତଦନ୍ତ କରାଯାଉଥିବା ଡିସିପି କହିଛନ୍ତି। ତେବେ ଏ ନେଇ ଭୀମସେନଙ୍କ ସହ ଯୋଗାଯୋଗ ପାଇଁ ଚେଷ୍ଟା କରାଯାଇଥିଲେ ବି, ତାହା ସମ୍ଭବ ହୋଇପାରିନି।

ଏ ପୁରା ମାମଲା ସାମ୍ନାକୁ ଆସିବା ପରେ ପ୍ରଶ୍ନ ଉଠୁଛି ବାଲେଶ୍ବରରେ ମେଡିକାଲ ପଢୁଥିବା ଛାତ୍ରୀ ଚନ୍ଦ୍ରିକା ତ୍ରିଶୁଳିଆ ବ୍ରିଜ୍ ତଳକୁ ଆସିଲେ କେମିିତି ? ପ୍ରେମରେ ଧୋକ୍କା ପରେ ସେ ଆତ୍ମହତ୍ୟା କରିଛନ୍ତି ନା ତାଙ୍କୁ କେହି ଯୋଜନାବଦ୍ଧ ଭାବେ ହତ୍ୟା କରି ଏଠାରେ ଫିଙ୍ଗି ଦେଇଛନ୍ତି ? ଝିଅର ମୃତ୍ୟୁ ପଛରେ ଚନ୍ଦ୍ରିକାଙ୍କ ପରିବାର, ବୟଫ୍ରେଣ୍ଡ ଭୀମସେନଙ୍କ ସହ ଅନ୍ୟ ଜଣେ ଯୁବତୀଙ୍କୁ ମଧ୍ୟ ଯୋଡ଼ୁଛନ୍ତି। ତେଣୁ ଘଟଣା ଉପରୁ ରହସ୍ୟ ଉଠାଇବାକୁ ପୋଲିସ ଭୀମସେନଙ୍କ ସହ ସଂପୃକ୍ତ ଯୁବତୀଙ୍କୁ ଜେରା କରିବ ତ ?