ଗାଙ୍ଗଟକ: ସିକ୍କିମର ଅତି ଦୁର୍ଗମ ଏବଂ କଠିନ ସୀମାନ୍ତ ଅଞ୍ଚଳରେ ପ୍ରବଳ ଶୀତ ଓ ପ୍ରତିକୂଳ ପାଣିପାଗକୁ ଖାତିର ନକରି ଦେଶର ସୁରକ୍ଷାରେ ଦିନରାତି ଏକ କରିଥିବା ବୀର ଯବାନମାନଙ୍କ ଗ୍ରାମ ଓ ପରିବାରଠାରୁ ଦୂରରେ ରହି ସେମାନଙ୍କ ସହିତ ଦୀପାବଳିର ଆଲୋକ ପର୍ବ ପାଳନ କରିଛନ୍ତି ଦେଶର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ। ପବିତ୍ର ଦୀପାବଳିର ଏହି ବିଶେଷ ଅବସରରେ ସେ ସିକ୍କିମର ଅଗ୍ରଭାଗରେ ମୁତୟନ ଥିବା ତ୍ରିଶକ୍ତି କର୍ପସର ସୈନିକମାନଙ୍କ ପାଖରେ ପହଞ୍ଚି ସେମାନଙ୍କୁ ଶୁଭକାମନା ଜଣାଇବା ସହ ସେମାନଙ୍କର ଅନନ୍ୟ ତ୍ୟାଗ, ସାହସ ଏବଂ ନିଃସ୍ୱାର୍ଥପର ସେବାକୁ ଭୂୟସୀ ପ୍ରଶଂସା କରିଛନ୍ତି।
ଏହି ଗସ୍ତ ସମୟରେ ପ୍ରତିରକ୍ଷା ମନ୍ତ୍ରୀଙ୍କ ସହିତ ସ୍ଥଳସେନା ମୁଖ୍ୟ ଜେନେରାଲ ଧୀରଜ ସେଠ୍, ଇଷ୍ଟର୍ଣ୍ଣ କମାଣ୍ଡର ଜେନେରାଲ ଅଫିସର କମାଣ୍ଡିଂ-ଇନ୍-ଚିଫ୍ ଲେଫ୍ଟନାଣ୍ଟ ଜେନେରାଲ ଭି.ଏମ୍.ବି. କ୍ରିଷ୍ଣନ ଏବଂ ୩୩ କର୍ପସର ଜେନେରାଲ ଅଫିସର କମାଣ୍ଡିଂ ଲେଫ୍ଟନାଣ୍ଟ ଜେନେରାଲ ମନ୍ ରାଜ ସିଂହ ମାନ୍ନଙ୍କ ସମେତ ଭାରତୀୟ ସେନାର ବହୁ ବରିଷ୍ଠ ଅଧିକାରୀ ଉପସ୍ଥିତ ରହି ଯବାନମାନଙ୍କ ମନୋବଳକୁ ଦୃଢ଼ କରିଥିଲେ।
ଶେରାଥାଙ୍ଗଠାରେ ଯବାନମାନଙ୍କ ସହ ଆଲୋଚନା କରିବା ଅବସରରେ ପ୍ରତିରକ୍ଷା ମନ୍ତ୍ରୀ କହିଥିଲେ ଯେ ଦେଶର ସୀମା ସୁରକ୍ଷାରେ ନିୟୋଜିତ ସୈନିକମାନେ ହିଁ ପ୍ରକୃତ ଅର୍ଥରେ ଦୀପାବଳିର ପ୍ରକୃତ ଆଲୋକ ଅଟନ୍ତି। ସୀମାରେ ସେମାନଙ୍କର ନିରନ୍ତର ସତର୍କତା, ଜାଗ୍ରତ ପ୍ରହରା ଏବଂ ଦୃଢ଼ ସମର୍ପଣ ଯୋଗୁଁ ହିଁ ଦେଶର କୋଟି କୋଟି ଜନତା ନିଜ ନିଜ ପରିବାର ସହ ସୁରକ୍ଷିତ ଭାବେ ଆଲୋକର ଏହି ମହାନ ପର୍ବକୁ ଉପଭୋଗ କରିପାରୁଛନ୍ତି। ଗୋଟିଏ ଛୋଟ ଦୀପ ଯେପରି ନିରବରେ ଚତୁର୍ଦ୍ଦିଗର ଅନ୍ଧକାରକୁ ଦୂର କରିଥାଏ, ସେହିପରି ଏହି ଯବାନମାନେ ମଧ୍ୟ କୌଣସି ପ୍ରଚାର କିମ୍ବା ଯଶର ଆଶା ନ ରଖି ନିଷ୍ଠାର ସହ ନିଜର ପବିତ୍ର କର୍ତ୍ତବ୍ୟ ସମ୍ପାଦନ କରିଥାନ୍ତି। ସେମାନଙ୍କର ଏହି ନିଃସ୍ୱାର୍ଥପର ଜାଗ୍ରତ ପ୍ରହରା ସମଗ୍ର ଦେଶବାସୀଙ୍କୁ ଶାନ୍ତି, ନିରାପତ୍ତା ଏବଂ ଭରସାର ଅନୁଭବ ଦେଇଥାଏ ବୋଲି ସେ ମତବ୍ୟକ୍ତ କରିଥିଲେ।
ଉଚ୍ଚ ପାର୍ବତ୍ୟ ଅଞ୍ଚଳର ଅତ୍ୟନ୍ତ କଠିନ ପରିସ୍ଥିତି ଏବଂ ଚରମ ଜଳବାୟୁ ସତ୍ତ୍ୱେ ଯବାନମାନେ ଯେଉଁ ଅଦମ୍ୟ ସାହସ, ବୃତ୍ତିଗତ ଦକ୍ଷତା ଏବଂ ଅପାର ମନୋବଳ ସହ ଦେଶର ପ୍ରତିଟି ସୀମାକୁ ସୁରକ୍ଷା ଦେଉଛନ୍ତି, ତାହା ପ୍ରଶଂସାରୀୟ ବୋଲି ସେ କହିଥିଲେ। ଆଜିର ଆଧୁନିକ ଯୁଗରେ ପ୍ରଯୁକ୍ତିବିଦ୍ୟା ଯେତେ ଉନ୍ନତ ହେଉନା କେଁାହୁ କାହିଁକି, ଜଣେ ସୈନିକଙ୍କ ଶରୀର ଓ ମନରେ ଯଦି ଅଟଳ ଶୃଙ୍ଖଳା ଏବଂ ପ୍ରଚଣ୍ଡ ସାହସ ନାହିଁ, ତେବେ ସେହି ପ୍ରଯୁକ୍ତିର କୌଣସି ବିଶେଷ ଉପଯୋଗିତା ରହିବ ନାହିଁ ବୋଲି ସେ ଦୃଢ଼ୋକ୍ତି ପ୍ରକାଶ କରିଥିଲେ। ଜଣେ ସୈନିକଙ୍କର ଆଚରଣ, ପୋଷାକ ପରିଚ୍ଛଦ, ଭାଷା ଏବଂ ସଂଯମ ହିଁ ସାଧାରଣ ଜନତାଙ୍କ ମନରେ ସେନାବାହିନୀ ପ୍ରତି ସମ୍ମାନ ଓ ଭରସାର ଭାବନା ସୃଷ୍ଟି କରିଥାଏ। ତେଣୁ ଶେରାଥାଙ୍ଗ ଏବଂ ଏହାର ଆଖପାଖ ଅଞ୍ଚଳରେ ବସବାସ କରୁଥିବା ସାଧାରଣ ଜନତାଙ୍କ ସହ ଭାରତୀୟ ସେନାର ରହିଥିବା ପାରମ୍ପରିକ ବିଶ୍ୱାସ ଓ ସୌହାର୍ଦ୍ଦ୍ୟର ସମ୍ପର୍କକୁ ଆହୁରି ଅଧିକ ମଜବୁତ କରିବାକୁ ସେ ସମସ୍ତ ଯବାନମାନଙ୍କୁ ଆହ୍ୱାନ ଦେଇଥିଲେ।
ଦୀପାବଳିର ଏହି ପବିତ୍ର ଉତ୍ସବ ପାଳନ ସହିତ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଶେରାଥାଙ୍ଗ ଯୁଦ୍ଧ ସ୍ମାରକୀକୁ ଯାଇ ଦେଶର ସାର୍ବଭୌମତ୍ୱ ଓ ଅଖଣ୍ଡତା ରକ୍ଷା ପାଇଁ ଆପ୍ରାଣ ଉଦ୍ୟମ କରି ସର୍ବୋଚ୍ଚ ବଳିଦାନ ଦେଇଥିବା ଅମର ବୀର ଯବାନମାନଙ୍କୁ ଗଭୀର ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ଏହାପରେ ସେ ସେଠାକାର ବିଶ୍ୱବିଖ୍ୟାତ ବାବା ହରଭଜନ ସିଂହ ସ୍ମାରକୀ ପରିଦର୍ଶନ କରି ସେଠାରେ ମଧ୍ୟ ନିଜର ଅନ୍ତରୁ ଶ୍ରଦ୍ଧା ଓ ସମ୍ମାନ ଜଣାଇଥିଲେ। ଶେରାଥାଙ୍ଗ ଯୁଦ୍ଧ ସ୍ମାରକୀର ଗୁରୁତ୍ୱ ସମ୍ପର୍କରେ ଆଲୋକପାତ କରି ସେ କହିଥିଲେ ଯେ ଏଭଳି ସ୍ମାରକୀଗୁଡ଼ିକ କେବଳ ଅତୀତର କିଛି ଘଟଣା ବା ବଳିଦାନକୁ ମନେ ପକାଇଥାଏ ତାହା ନୁହେଁ, ବରଂ ଏହା ଦେଶର ସାମୂହିକ ସ୍ମୃତି, ଜାତୀୟ ଚେତନା ଏବଂ ଅଦମ୍ୟ ଗର୍ବକୁ ସର୍ବଦା ଜାଗ୍ରତ ରଖିଥାଏ।
ଏହି ସ୍ମାରକୀଗୁଡ଼ିକରେ ସମ୍ମାନିତ ହୋଇଥିବା ସହିଦ ଯବାନମାନେ କେବଳ ଗୋଟିଏ ପ୍ରଦେଶରୁ ନୁହେଁ, ବରଂ ନାଗାଲାଣ୍ଡ, ଉତ୍ତରପ୍ରଦେଶ, ତାମିଲନାଡୁ, ରାଜସ୍ଥାନ, ଆସାମ ସମେତ ଦେଶର କୋଣ ଅନୁକୋଣରୁ ଆସିଥିଲେ। ସେମାନଙ୍କ ମଧ୍ୟରେ ଭାଷା, ଅଞ୍ଚଳ, ଧର୍ମ ଏବଂ ସମ୍ପ୍ରଦାୟର କୌଣସି ପାର୍ଥକ୍ୟ ନଥିଲା; ସମସ୍ତଙ୍କର ଗୋଟିଏ ପରିଚୟ ଥିଲା-‘ଭାରତୀୟ’। ସେମାନେ ନିଜର ବ୍ୟକ୍ତିଗତ ଜୀବନ ଓ ପରିବାରର ସୁଖକୁ ପଛରେ ପକାଇ କେବଳ ଦେଶବାସୀଙ୍କ ସୁରକ୍ଷା ପାଇଁ ନିଜର ପ୍ରାଣ ବଳିଦାନ ଦେଇଥିଲେ। ଏହି ଅଖଣ୍ଡ ଏକତା ଏବଂ ନିଃସ୍ୱାର୍ଥପର ସେବାଭାବ ହିଁ ଭାରତବର୍ଷର ପ୍ରକୃତ ଶକ୍ତି ଏବଂ ମହାନ ପରିଚୟ ବୋଲି ସେ ଗର୍ବର ସହ ପ୍ରକାଶ କରିଥିଲେ।
ଦେଶର ବୀର ସହିଦମାନଙ୍କ ସ୍ମୃତିଚାରଣ କରି ପ୍ରତିରକ୍ଷା ମନ୍ତ୍ରୀ ଆହୁରି ମଧ୍ୟ କହିଥିଲେ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟିସମ୍ପନ୍ନ ନେତୃତ୍ୱରେ କେନ୍ଦ୍ର ସରକାର ଦିଲ୍ଲୀର ଇଣ୍ଡିଆ ଗେଟ୍ ପରିସରରେ ଏକ ଭବ୍ୟ ଏବଂ ଆଧୁନିକ ଜାତୀୟ ଯୁଦ୍ଧ ସ୍ମାରକୀ ପ୍ରତିଷ୍ଠା କରିଛନ୍ତି। ମାତୃଭୂମିର ସୁରକ୍ଷା ପାଇଁ ସର୍ବୋଚ୍ଚ ବଳିଦାନ ଦେଇଥିବା ସମସ୍ତ ବୀର ଯବାନଙ୍କ ସ୍ମୃତିକୁ ଚିରସ୍ମରଣୀୟ କରିବା ପାଇଁ ଏହି ସ୍ମାରକୀ ନିର୍ମାଣ କରାଯାଇଛି। ଏହି ଜାତୀୟ ସ୍ମାରକୀରେ ଦେଶର ପ୍ରାୟ ୨୬ ହଜାର ସହିଦ ଯବାନଙ୍କ ନାମ ସୁନା ଅକ୍ଷରରେ ସ୍ଥାନିତ ହୋଇଛି। ଯେତେବେଳେ ଜଣେ ସହିଦଙ୍କର ପରିବାରବର୍ଗ, ଆତ୍ମୀୟସ୍ୱଜନ କିମ୍ବା ସେମାନଙ୍କ ଜନ୍ମମାଟିର ଲୋକମାନେ ଏହି ପବିତ୍ର ସ୍ମାରକୀକୁ ଆସି ସେଠାରେ ନିଜର ପ୍ରିୟଜନଙ୍କ ନାମ ଦେଖନ୍ତି, ସେତେବେଳେ ସେମାନଙ୍କ ମନରେ ଏକ ଅପୂର୍ବ ଗର୍ବ, ଗୌରବ ଏବଂ ଅଭୁଲା ସମ୍ମାନର ଭାବନା ଜାଗ୍ରତ ହୋଇଥାଏ। ଏଭଳି ପ୍ରେରଣାଦାୟକ ସ୍ମାରକୀଗୁଡ଼ିକ ଆଗାମୀ ପିଢ଼ିର ଯୁବକଯୁବତିମାନଙ୍କୁ ଦେଶସେବାରେ ଆତ୍ମନିୟୋଗ କରିବା ପାଇଁ ସର୍ବଦା ପ୍ରେରଣା ଯୋଗାଉଥିବ।
ପରିଶେଷରେ, ଦେଶର ସୀମାକୁ ସୁରକ୍ଷା ଦେବାକୁ ଯାଇ ନିଜର ସୁଖଶାନ୍ତିକୁ ଜଳାଞ୍ଜଳି ଦେଇ କର୍ତ୍ତବ୍ୟ ପଥରେ ଅଟଳ ରହିଥିବା ପ୍ରତ୍ୟେକଟି ସୈନିକଙ୍କ ମହାନ ତ୍ୟାଗକୁ ସମ୍ମାନ ଜଣାଇବା ଏବଂ ଦୀପାବଳିର ଏହି ଆଲୋକମୟ ପର୍ବରେ ସେମାନଙ୍କ ମନୋବଳକୁ ଦ୍ୱିଗୁଣିତ କରିବା ପାଇଁ ପ୍ରତିରକ୍ଷା ମନ୍ତ୍ରୀଙ୍କ ଏହି ସିକ୍କିମ ଗସ୍ତ ଏକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ପ୍ରେରଣାଦାୟକ ପଦକ୍ଷେପ ବୋଲି ସାଧାରଣରେ ଚର୍ଚ୍ଚା ହେଉଛି।
