ଭୁବନେଶ୍ୱର/କଟକ: ଧୁମଧାମରେ ପାଳନ ହୋଇଛି ମା’ ଦୁର୍ଗାଙ୍କ ବିଜୟା ଦଶମୀ। ଏବେ ମା’ଙ୍କୁ ମେଲାଣି ଦେବାର ପାଳି। ଆଜି ଭୁବନେଶ୍ୱର, କଟକ ସମେତ ରାଜ୍ୟର ବିଭିନ୍ନ ସ୍ଥାନରେ ଦୁର୍ଗା ମେଢ଼ର ଭସାଣୀ ଶୋଭାଯାତ୍ରା ଅନୁଷ୍ଠିତ ହେବ। ଏଥିପାଇଁ ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ଶେଷ ହୋଇଛି। ଭସାଣୀ ଉତ୍ସବକୁ ଶାନ୍ତିପୂର୍ଣ୍ଣ, ଶୃଙ୍ଖଳିତ ଓ ସୁରକ୍ଷିତ କରିବା ସହ ଟ୍ରାଫିକ୍ ନିୟନ୍ତ୍ରଣ ପାଇଁ ପୁଲିସ ପକ୍ଷରୁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି।
ଭସାଣୀ ଶୋଭାଯାତ୍ରା ସମୟରେ ଭିଡ଼ ନିୟନ୍ତ୍ରଣ ଓ ଆଇନଶୃଙ୍ଖଳା ରକ୍ଷା ପାଇଁ ଓଡ଼ିଶା ପୁଲିସ ଏବଂ କମିଶନରେଟ୍ ପୁଲିସ ପକ୍ଷରୁ କଡ଼ା ନିର୍ଦ୍ଦେଶାବଳୀ ଜାରି କରାଯାଇଛି। ଶୋଭାଯାତ୍ରାରେ ଡିଜେ ବ୍ୟବହାର ଉପରେ କଟକଣା ଲଗାଯାଇଛି। ନିୟମ ଉଲ୍ଲଂଘନ ନକରି ଶାନ୍ତିଶୃଙ୍ଖଳାର ସହ ଭସାଣୀ ଉତ୍ସବ ପାଳନ କରିବାକୁ ପୂଜା କମିଟିଗୁଡ଼ିକୁ ପରାମର୍ଶ ଦିଆଯାଇଛି।
ଭସାଣୀ ଶୋଭାଯାତ୍ରା ଯୋଗୁଁ କେତେକ ରାସ୍ତାରେ ଯାତାୟାତ ପ୍ରଭାବିତ ହୋଇପାରେ। ତେଣୁ ଯାତ୍ରୀମାନେ ଘରୁ ବାହାରିବା ପୂର୍ବରୁ ପୁଲିସର ସରକାରୀ ଟ୍ରାଫିକ୍ ଆଡଭାଇଜରି ଓ ବିକଳ୍ପ ରୁଟ୍ ସମ୍ପର୍କରେ ତଥ୍ୟ ଜାଣି ନେବା ଉଚିତ। ଭିଡ଼ ଥିବା ଅଞ୍ଚଳରେ ଅନାବଶ୍ୟକ ଗାଡ଼ି ନେବାରୁ ଦୂରେଇ ରହିବା ସହ ଟ୍ରାଫିକ୍ ପୁଲିସଙ୍କ ନିର୍ଦ୍ଦେଶ ମାନିବାକୁ ପରାମର୍ଶ ଦିଆଯାଉଛି।
ମା’ଙ୍କ ମୂର୍ତ୍ତି ବିସର୍ଜନକୁ ସୁରକ୍ଷିତ ଓ ଶୃଙ୍ଖଳିତ କରିବା ପାଇଁ ଅସ୍ଥାୟୀ ପୋଖରୀ ନିର୍ମାଣ କରାଯାଇଛି। ଏଥିସହ ପୂଜା ମଣ୍ଡପଗୁଡ଼ିକରେ ଅଗ୍ନି ନିରାପତ୍ତା ଓ ଭିଡ଼ ନିୟନ୍ତ୍ରଣ ପାଇଁ ମଧ୍ୟ ସ୍ୱତନ୍ତ୍ର ବ୍ୟବସ୍ଥା ହୋଇଛି। ମା’ଙ୍କ ମେଲାଣିକୁ ନେଇ ଭକ୍ତଙ୍କ ମଧ୍ୟରେ ଉତ୍ସାହ ରହିଥିବା ବେଳେ ସୁରକ୍ଷିତ ଭସାଣୀ ଓ ସୁଗମ ଯାତାୟାତ ପାଇଁ ପ୍ରଶାସନର ନିୟମ ମାନିବା ସହଯୋଗ କରିବ।
