ନୂଆଦିଲ୍ଲୀ: ଭାରତ ଏବଂ ଚୀନର କୋର କମାଣ୍ଡରଙ୍କ ମଧ୍ୟରେ ପ୍ରଥମ ବଡ଼ ବିପିଏମ ବୈଠକ ଅରୁଣାଚଳ ପ୍ରଦେଶରେ ଅନୁଷ୍ଠିତ ହେବ। ଏହି ବୈଠକ ଆଜି ଚୀନ ସୀମାର କିବିଥୁ ନିକଟସ୍ଥ ୱାଚା-ଡ଼ମଇ ବର୍ଡର ପର୍ଶନାଲ ମିଟିଂ (ବିପିଏମ) ପଏଣ୍ଟରେ ଅନୁଷ୍ଠିତ ହେବ। ଗତ ମାସ ଧରି ଉପର ସୁବାନସିରି ଅଞ୍ଚଳରେ ଭାରତ ଏବଂ ଚୀନ ସେନା ମଧ୍ୟରେ ଉତ୍ତେଜନା ଲାଗି ରହିଛି। ତଥାପି, ଭାରତୀୟ ସେନା ପକ୍ଷରୁ ଏପର୍ଯ୍ୟନ୍ତ କୌଣସି ସରକାରୀ ବିବୃତ୍ତି ଜାରି କରାଯାଇ ନାହିଁ।
ସୂଚନା ଅନୁସାରେ ଆଜି ପୂର୍ବ ସେକ୍ଟରରେ କୋର କମାଣ୍ଡର ସ୍ତରୀୟ ଅଧିକାରୀଙ୍କ ମଧ୍ୟରେ ପ୍ରଥମ ବୈଠକ ହେବ। ଏହି ବୈଠକ ଅଞ୍ଚଳରେ ଚାଲିଥିବା ସମସ୍ୟାର ସମାଧାନ କରିବାରେ ସାହାଯ୍ୟ କରିବ। ଏହା ଉଲ୍ଲେଖନୀୟ ଯେ, ଏହି ବୈଠକ ଭାରତ ପାର୍ଶ୍ୱରେ ୱାଚା ବର୍ଡର ମିଟିଂ ପଏଣ୍ଟରେ ଅନୁଷ୍ଠିତ ହେବ।
ପ୍ରକୃତ ନିୟନ୍ତ୍ରଣ ରେଖା
ଚୀନ କମାଣ୍ଡରଙ୍କ ସହ ବୈଠକରେ ଭାରତୀୟ ପକ୍ଷର ପ୍ରତିନିଧିତ୍ୱ ତୃତୀୟ କର୍ପସ କମାଣ୍ଡର କରିବେ। ଅରୁଣାଚଳ ପ୍ରଦେଶରେ ଚୀନ୍ ସହିତ ଥିବା ପ୍ରକୃତ ନିୟନ୍ତ୍ରଣ ରେଖା ଭାରତୀୟ ସେନାର ଦୁଇଟି କର୍ପସ ଦ୍ୱାରା ତଦାରଖ କରାଯାଏ, ଯେଉଁଥିରେ ତେଜପୁରରେ ଅବସ୍ଥିତ ଚତୁର୍ଥ କର୍ପସ ଏବଂ ରଙ୍ଗାପାହାରରେ ଅବସ୍ଥିତ ତୃତୀୟ କର୍ପସ ଅନ୍ତର୍ଭୁକ୍ତ। ସୂଚନା ଅନୁଯାୟୀ ଭାରତୀୟ ସେନା ସେହି ଅଞ୍ଚଳରେ ଚୀନ୍ ସୈନିକଙ୍କ ସ୍ଥିତିକୁ ସମାଧାନ କରିବା ପାଇଁ ଏକ ଅତ୍ୟନ୍ତ କଠୋର ଆଭିମୁଖ୍ୟ ଗ୍ରହଣ କରିଛି।
