ବାଲେଶ୍ବର, ୨୨/୭(କୃଷ୍ଣ କୁମାର ମହାନ୍ତି) ଆଜି ବାଲେଶ୍ବର ଜିଲ୍ଲାର ଇମାମି ନଗର ସ୍ଥିତ ପବିତ୍ର ଶ୍ରୀ ଗୁଣ୍ଡିଚା ମନ୍ଦିର ମେଳାପଡ଼ିଆରେ ଏକ ଅତ୍ୟନ୍ତ ଭବ୍ୟ, ଗାମ୍ଭୀର୍ୟମୟ ଓ ଆଧ୍ୟାତ୍ମିକ ଉଜ୍ଜ୍ଵଳତାରେ ଭରିଥିବା ମହୋତ୍ସବ ଅନୁଷ୍ଠିତ ହୋଇଯାଇଛି।
ସକାଳୁ ଠାରୁ ଭକ୍ତମାନଙ୍କର ଭିଡ଼ ଓ ଭକ୍ତିର ଅବିରତ ଧାରା ସମଗ୍ର ପରିସରକୁ ଏକ ପବିତ୍ର ତୀର୍ଥକ୍ଷେତ୍ରର ରୂପ ଦେଇଥିଲା।
ପୂର୍ବାହ୍ନରେ ତୁଳସୀ ଅଭିଷେକ ପବିତ୍ର ଭାବରେ ସମ୍ପନ୍ନ ହୋଇଥିଲା। ଏହାପରେ ଶ୍ରଦ୍ଧା, ଶାସ୍ତ୍ର ଓ ସନାତନ ପରମ୍ପରାର ଗାମ୍ଭୀର୍ଯକୁ ଅନୁଭବ କରାଇଥିବା ବ୍ରାହ୍ମଣ ମହାସଭା ଆୟୋଜିତ ହୋଇଥୁଲା I ଅମୃତବାଣୀ ଶିକ୍ଷା କେନ୍ଦ୍ରର ପ୍ରତିଭାଶାଳୀ ଶିକ୍ଷାର୍ଥୀମାନଙ୍କ ଦ୍ବାରା ଶୁଦ୍ଧ ଓ ମଧୁର ବେଦପାଠ ହୋଇ ସମଗ୍ର ମେଳାପଡ଼ିଆ ଆଧ୍ୟାତ୍ମିକ ସ୍ପନ୍ଦନରେ ପ୍ରକମ୍ପିତ ହୋଇଯାଇଥିଲା I ସେହି ଦିବ୍ୟ ଧ୍ୱନି ଓ ମସ୍ତ୍ରୋଚ୍ଚାରଣ ସମସ୍ତଙ୍କ ହୃଦୟକୁ ଭକ୍ତିର ସୁଗନ୍ଧରେ ଭରିଦେଇଥିଲା।
ଅପରାହ୍ନରେ ଆୟୋଜିତ ଇଣ୍ଟର-ସ୍କୁଲ୍ ଭାଷଣ ପ୍ରତିଯୋଗିତା ଯୁବ ପିଢ଼ୀର ମାନସିକ ପ୍ରତିଭା ଓ ଅଭିବ୍ୟକ୍ତିର ଦକ୍ଷତାକୁ ଉଜାଗର କରିଥିଲା I ବିଭିନ୍ନ ବିଦ୍ୟାଳୟର ଶିକ୍ଷାର୍ଥୀମାନେ ଅତ୍ୟନ୍ତ ଉତ୍ସାହ, ଆତ୍ମବିଶ୍ଵାସ ଓ ଭାବଗମ୍ଭୀର୍ଯର ସହ ଅଂଶଗ୍ରହଣ କରି ନିଜ ଭାଷଣ ମାଧ୍ୟମରେ ଉପସ୍ଥିତ ସମସ୍ତଙ୍କୁ ଆକର୍ଷିତ କରିଥିଲେ I
ସନ୍ଧ୍ୟାବେଳେ ସମଗ୍ର ପରିବେଶ ଏକ ଦିବ୍ୟ ଓ ମନୋମୋହନୀୟ ଭକ୍ତିମୟ ରୂପ ଧାରଣ କରିଥିଲା I ବୃନ୍ଦାବନରୁ ଆଗତ ପ୍ରସିଦ୍ଧ କଳାକାରମାନଙ୍କ ଦ୍ବାରା ରାସଲୀଳାର ଅପୂର୍ବ ପରିବେଶଣ ହୋଇଥିଲା I ଏହି ରାସଲୀଳାରେ ଭଗବାନ ଶ୍ରୀକୃଷ୍ଣଙ୍କ ଦିବ୍ୟ ଲୀଳାର ସୁନ୍ଦର, ରସମୟ ଓ ଆକର୍ଷଣୀୟ ଚିତ୍ରଣ ସମସ୍ତଙ୍କୁ ମନୋମୁଗ୍ଧ କରିଦେଇଥିଲା I ସେହି ଦିବ୍ୟ ନୃତ୍ୟ ଓ ସଙ୍ଗୀତର ସମନ୍ବୟ ଭକ୍ତମାନଙ୍କୁ ଏକ ଅଲୌକିକ ଆଧ୍ୟାତ୍ମିକ ଅନୁଭୂତିରେ ବିଲୀନ କରିଦେଇଥିଲା। ଏହି ସାନ୍ଧ୍ୟ ଅଧିବେଶନରେ ନୀଳଗିରି ଉପ ଜିଲ୍ଲାପାଳ ଶ୍ରୀମତୀ ଶୁଭଶ୍ରୀ ରଥ ଅତିଥି ଭାବେ ଯୋଗ ଦେଇଥିଲେ।
ସମଗ୍ର କାର୍ଯକ୍ରମ ଭକ୍ତି, ସଂସ୍କୃତି ଓ ଆଧ୍ୟାତ୍ମିକତାର ଏକ ଅଦ୍ଭୁତ ସମନ୍ବୟ ରୂପେ ପ୍ରକାଶିତ ହୋଇଥିଲା I
