ଗଜପତି, ୨୧.୧୧(ମନୋଜ କୁମାର ପାଢୀଙ୍କ ରିପୋର୍ଟ):- ପବିତ୍ର କାର୍ତ୍ତିକ ମାସର ଅନ୍ତିମ ପର୍ଯ୍ୟାୟ ପଞ୍ଚୁକ ଅବସରରେ ଗଜପତି ଜିଲ୍ଲାର ପାରଳାଖେମୁଣ୍ଡି ସହରରେ ଭକ୍ତିମୟ ଓ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଛି। ଏହି ପବିତ୍ର ଅବସରରେ ସହରର ବିଭିନ୍ନ ମନ୍ଦିରରେ ଭକ୍ତ ଓ ଶ୍ରଦ୍ଧାଳୁଙ୍କ ପ୍ରବଳ ଜନସମାଗମ ଦେଖିବାକୁ ମିଳିଥିଲା।ପଞ୍ଚୁକରେ ସକାଳୁ ସକାଳୁ ମନ୍ଦିରଗୁଡ଼ିକରେ ଭକ୍ତମାନଙ୍କ ଭିଡ଼ ଲାଗି ରହିଥିଲା। ମହିଳା, ପୁରୁଷ, ବୟସ୍କ ଓ ଶିଶୁଙ୍କ ସମେତ ବହୁ ଶ୍ରଦ୍ଧାଳୁ ଶ୍ରଦ୍ଧା ଓ ଭକ୍ତିର ସହିତ ମନ୍ଦିରକୁ ଆସି ଦେବଦେବୀଙ୍କ ଦର୍ଶନ କରିବା ସହ ପୂଜାର୍ଚ୍ଚନା କରିଥିଲେ। ଭିଡ଼କୁ ଦୃଷ୍ଟିରେ ରଖି ଭକ୍ତମାନେ ଲମ୍ବା ଧାଡ଼ିରେ ଠିଆ ହୋଇ ଶୃଙ୍ଖଳିତ ଭାବେ ଠାକୁରଙ୍କ ଦର୍ଶନ କରିଥିଲେ। ଅନେକ ଶ୍ରଦ୍ଧାଳୁ ଦୀପ ଜାଳିବା ସହ ଫୁଲ, ତୁଳସୀ ଓ ଭୋଗ ଅର୍ପଣ କରି ପରିବାରର ସୁଖ, ଶାନ୍ତି ଓ ମଙ୍ଗଳ କାମନା କରିଥିଲେ।ଅନ୍ୟପକ୍ଷରେ ପଞ୍ଚୁକ ଅବସରରେ ସହରର କେତେକ ମନ୍ଦିର ଓ ଧାର୍ମିକ ଅନୁଷ୍ଠାନରେ ଅଷ୍ଟପ୍ରହରୀ ନାମ ସଂକୀର୍ତ୍ତନ କାର୍ଯ୍ୟକ୍ରମ ମଧ୍ୟ ଆୟୋଜିତ ହୋଇଥିଲା। ହରେ କୃଷ୍ଣ, ହରେ ରାମ ନାମ ଧ୍ୱନିରେ ମନ୍ଦିର ପରିସର ଓ ଆଖପାଖ ଅଞ୍ଚଳ ଭକ୍ତିମୟ ହୋଇଉଠିଥିଲା। ସଂକୀର୍ତ୍ତନରେ ସ୍ଥାନୀୟ ଶ୍ରଦ୍ଧାଳୁ ଓ ଭକ୍ତମାନେ ସାମିଲ ହୋଇ ନାମ ସ୍ମରଣ କରିଥିଲେ।କାର୍ତ୍ତିକ ମାସରେ ପଞ୍ଚୁକର ରହିଥିବା ବିଶେଷ ଧାର୍ମିକ ଓ ଆଧ୍ୟାତ୍ମିକ ମହତ୍ତ୍ୱ ଯୋଗୁଁ ଏହି ସମୟରେ ଭଗବାନଙ୍କ ଦର୍ଶନ, ପୂଜାପାଠ, ଦୀପଦାନ ଓ ନାମ ସଂକୀର୍ତ୍ତନ କରିବାକୁ ଶୁଭ ମନେ କରାଯାଏ। ଏହି ପରମ୍ପରାକୁ ଅନୁସରଣ କରି ପାରଳାଖେମୁଣ୍ଡି ସହରବାସୀ ଶ୍ରଦ୍ଧା, ନିଷ୍ଠା ଓ ଭକ୍ତିଭାବର ସହିତ ପଞ୍ଚୁକ ପାଳନ କରୁଥିବା ଦେଖିବାକୁ ମିଳିଛି।ସମଗ୍ର ସହରରେ ଘଣ୍ଟ, ଶଙ୍ଖ, ହୁଳହୁଳି ଓ ହରିନାମ ସଂକୀର୍ତ୍ତନର ଧ୍ୱନି ଏକ ଆଧ୍ୟାତ୍ମିକ ପରିବେଶ ସୃଷ୍ଟି କରିଥିବା ବେଳେ ଭକ୍ତି ଓ ଧାର୍ମିକ ଭାବନାରେ ମୁଖରିତ ହୋଇଉଠିଥିଲା ।
Sign in
Sign in
Recover your password.
A password will be e-mailed to you.