ଗଜପତି, ୨୪ ଅକ୍ଟୋବର ୨୦୨୬(ମନୋଜ କୁମାର ପାଢୀଙ୍କ ରିପୋର୍ଟ):ଗଜପତି ଜିଲ୍ଲାରେ କଂଗ୍ରେସ ସଂଗଠନକୁ ଅଧିକ ସୁଦୃଢ଼ ଓ ସକ୍ରିୟ କରିବା ଲକ୍ଷ୍ୟରେ ଓଡ଼ିଶା ପ୍ରଦେଶ କଂଗ୍ରେସ କମିଟି (OPCC)ର ରାଜ୍ୟ ସମ୍ପାଦିକା ଜସ୍ମିନ୍ ଶେଖଙ୍କ ସମେତ ଜିଲ୍ଲାର କଂଗ୍ରେସ ନେତୃବୃନ୍ଦ ଦଳର ବରିଷ୍ଠ ନେତାମାନଙ୍କୁ ସାକ୍ଷାତ କରିଛନ୍ତି।
ଏହି ଅବସରରେ ଜସ୍ମିନ୍ ଶେଖ, ଗୋଷାଣୀ ବ୍ଲକ କଂଗ୍ରେସ ସଭାପତି ଏ. ଶ୍ରୀନିବାସ ରାଓ, ଏସ୍. ପାପା ରାଓ ଏବଂ କେ. ବାଲକୃଷ୍ଣ ଓଡ଼ିଶା ପ୍ରଦେଶ କଂଗ୍ରେସ କମିଟିର ସଭାପତି ମାନ୍ୟବର ଭକ୍ତଚରଣ ଦାସଙ୍କୁ ସାକ୍ଷାତ କରିବା ସହ ଅଖିଳ ଭାରତୀୟ କଂଗ୍ରେସ କମିଟି (AICC)ର ବରିଷ୍ଠ ନେତୃବୃନ୍ଦ ଜେ.ଟି. କୁସୁମ କୁମାର ଏବଂ ଓଡ଼ିଶା କଂଗ୍ରେସର ପ୍ରଭାରୀ ଲାଲଜୀ ଦେଶାଇଙ୍କ ସହ ମଧ୍ୟ ସାକ୍ଷାତ କରିଥିଲେ।
ସାକ୍ଷାତକାର ସମୟରେ ଗଜପତି ଜିଲ୍ଲାରେ କଂଗ୍ରେସ ସଂଗଠନକୁ ତୃଣମୂଳ ସ୍ତରରୁ ମଜବୁତ କରିବା, ଦଳୀୟ କାର୍ଯ୍ୟକ୍ରମକୁ ଅଧିକ ବ୍ୟାପକ କରିବା ଏବଂ ଜନସାଧାରଣଙ୍କ ବିଭିନ୍ନ ସମସ୍ୟା ଓ ସ୍ୱାର୍ଥ ସମ୍ପର୍କିତ ବିଷୟ ଉପରେ ଆଲୋଚନା କରିବାକୁ ଗୁରୁତ୍ୱ ଦିଆଯାଇଥିଲା।
ଏଥିସହ ଜିଲ୍ଲାରେ ଦଳୀୟ କର୍ମୀ ଓ ନେତୃବୃନ୍ଦଙ୍କ ମଧ୍ୟରେ ସମନ୍ୱୟ ବୃଦ୍ଧି, ସାଂଗଠନିକ କାର୍ଯ୍ୟକଳାପକୁ ଗତିଶୀଳ କରିବା ଏବଂ ସାଧାରଣ ଲୋକଙ୍କ ସମସ୍ୟାର ସମାଧାନ ଦିଗରେ କଂଗ୍ରେସର ଭୂମିକାକୁ ଆହୁରି ସକ୍ରିୟ କରିବା ସମ୍ପର୍କରେ ମତବିନିମୟ ହୋଇଥିଲା।
ଗଜପତି ଜିଲ୍ଲାର କଂଗ୍ରେସ ନେତୃବୃନ୍ଦଙ୍କ ଏହି ସାକ୍ଷାତକୁ ଜିଲ୍ଲାରେ ଦଳୀୟ ସଂଗଠନକୁ ଆଗକୁ ନେବା ଏବଂ କର୍ମୀମାନଙ୍କ ମଧ୍ୟରେ ଏକତା ଓ ସମନ୍ୱୟ ବଢ଼ାଇବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ଦେଖାଯାଉଛି।
