ଭୁବନେଶ୍ବର: ଓଡ଼ିଶାରେ ଚଳିତ ବର୍ଷ ହୋଇଥିବା ବନ୍ୟା ଯୋଗୁଁ ବ୍ୟାପକ କ୍ଷୟକ୍ଷତି ଘଟିଛି। ଏହି ବନ୍ୟା ପ୍ରକୋପରେ ରାଜ୍ୟର ବିଭିନ୍ନ ଅଞ୍ଚଳ ପ୍ରଭାବିତ ହୋଇଥିବା ବେଳେ ବାସଗୃହ, ଚାଷଜମି ଏବଂ ଗୃହପାଳିତ ପଶୁସମ୍ପଦର ପ୍ରଚୁର କ୍ଷତି ସହିବାକୁ ପଡ଼ିଛି। ବିଧାନସଭାରେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ଏକ ଲିଖିତ ଉତ୍ତର ଜରିଆରେ ବନ୍ୟା କ୍ଷୟକ୍ଷତି ଏବଂ ସରକାରଙ୍କ ପକ୍ଷରୁ ଯୋଗାଇ ଦିଆଯାଇଥିବା ରିଲିଫ୍ ସହାୟତାର ସମ୍ପୂର୍ଣ୍ଣ ସରକାରୀ ହିସାବ ସାମ୍ନାକୁ ଆଣିଛନ୍ତି।
ସରକାରୀ ତଥ୍ୟ ଅନୁଯାୟୀ, ଗ୍ରହଣ କରାଯାଇଥିବା କ୍ଷୟକ୍ଷତି ଆକଳନ ଅନୁସାରେ ଚଳିତ ବନ୍ୟାରେ ମୋଟ ୭ ଜଣ ନିରୀହ ଲୋକଙ୍କର ଜୀବନ ଯାଇଥିବା ବେଳେ ୯୩ଟି ଗୃହପାଳିତ ପଶୁଙ୍କର ମୃତ୍ୟୁ ଘଟିଛି। ସେହିପରି ପ୍ରବଳ ବର୍ଷା ଏବଂ ବନ୍ୟା ଜଳର ସ୍ରୋତରେ ରାଜ୍ୟର ବିଭିନ୍ନ ଜିଲ୍ଲାରେ ମୋଟ ୧୮,୦୭୬ଟି ବାସଗୃହ ଆଂଶିକ କିମ୍ବା ସମ୍ପୂର୍ଣ୍ଣ ଭାବେ ଭାଙ୍ଗି ନଷ୍ଟ ହୋଇଯାଇଛି। ଚାଷକାର୍ଯ୍ୟ କ୍ଷେତ୍ରରେ ମଧ୍ୟ ବନ୍ୟା ବଡ଼ ବିପର୍ଯ୍ୟୟ ଆଣିଦେଇଛି। ରାଜ୍ୟର ପ୍ରାୟ ୨ ଲକ୍ଷ ୧୨ ହଜାର ୫୩୩ ହେକ୍ଟର ଚାଷଜମିରେ ଫସଲ ସମ୍ପୂର୍ଣ୍ଣ ଭାବେ ବୁଡ଼ିଯାଇ ନଷ୍ଟ ହୋଇଛି, ଯାହା ଚାଷୀକୂଳକୁ ଗଭୀର ଆଘାତ ଦେଇଛି।
ବନ୍ୟା ବିପନ୍ନଙ୍କ ସହାୟତା ଏବଂ କ୍ଷତିଭରଣା ପାଇଁ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ଖାତରେ ବ୍ୟାପକ ଆର୍ଥିକ ଅନୁଦାନ ମଞ୍ଜୁର କରାଯାଇଛି। ସରକାରଙ୍କ ପକ୍ଷରୁ ପ୍ରଭାବିତଙ୍କୁ ବ୍ୟକ୍ତିଗତ କ୍ଷତି ଭରଣା ବାବଦରେ ସମୋଟ ୨୩୪ କୋଟି ୮୪ ଲକ୍ଷ ୮୬ ହଜାର ଟଙ୍କାର ପ୍ରତ୍ୟକ୍ଷ ସହାୟତା ପ୍ରଦାନ କରାଯାଇଛି। ଏହା ମଧ୍ୟରୁ ଭଙ୍ଗାଯାଇଥିବା ଘରଗୁଡ଼ିକର ପୁନଃନିର୍ମାଣ ଓ ମରାମତି ବାବଦକୁ ୩୩ କୋଟି ଟଙ୍କା ଏବଂ କ୍ଷତିଗ୍ରସ୍ତ ଚାଷୀମାନଙ୍କୁ ଫସଲ କ୍ଷତିପୂରଣ ବାବଦରେ ୧୫୧ କୋଟି ଟଙ୍କାର ଆର୍ଥିକ ପ୍ୟାକେଜ୍ ବଣ୍ଟନ କରାଯାଇଛି।
ଏଥିସହିତ ପ୍ରଭାବିତ ଜନସାଧାରଣଙ୍କ ମୌଳିକ ଆବଶ୍ୟକତା ପୂରଣ ପାଇଁ ରିଲିଫ ସାମଗ୍ରୀ ସହ ଆର୍ଥିକ ଅନୁଦାନ ପ୍ରଦାନ କରାଯାଇଛି। ବନ୍ୟା ପ୍ରଭାବିତ ପରିବାରଗୁଡ଼ିକୁ ପୋଷାକପତ୍ର କ୍ରୟ ପାଇଁ ୯ କୋଟି ୪୭ ଲକ୍ଷ ଟଙ୍କା ଏବଂ ନୂତନ ବାସନକୁସନ ଖରିଦ କରିବା ପାଇଁ ଅନ୍ୟ ୯ କୋଟି ୪୭ ଲକ୍ଷ ଟଙ୍କାର ସହାୟତା ରାଶି ଯୋଗାଇ ଦିଆଯାଇଛି। ବନ୍ୟା ଜଳ ପ୍ରବାହିତ ହୋଇ ବାଲିଚର ହୋଇପଡ଼ିଥିବା ଚାଷଜମିଗୁଡ଼ିକର ପୁନରୁଦ୍ଧାର ଏବଂ ସୁଧାର ଆଣିବା ପାଇଁ ସରକାରଙ୍କ ପକ୍ଷରୁ ୪ କୋଟି ଟଙ୍କା ଖର୍ଚ୍ଚ କରାଯାଇଛି।
କ୍ଷେତ୍ର ସ୍ତରରେ ବିପନ୍ନଙ୍କ ପାଖରେ ଜରୁରୀକାଳୀନ ରିଲିଫ ସାମଗ୍ରୀ ପହଞ୍ଚାଇବା ପାଇଁ ପ୍ରଶାସନ ପକ୍ଷରୁ ବ୍ୟାପକ ପଦକ୍ଷେପ ନିଆଯାଇଥିଲା। ସରକାରୀ ରିପୋର୍ଟ ଅନୁସାରେ, ବନ୍ୟାଞ୍ଚଳରେ ମୋଟ ୧୫,୭୧୫ କୁଇଣ୍ଟାଲ ଚାଉଳ, ୧୨,୮୬୩ କୁଇଣ୍ଟାଲ ଡାଲି, ୧,୪୪୮ କୁଇଣ୍ଟାଲ ଗୁଡ଼ ଏବଂ ଅସ୍ଥାୟୀ ଆଶ୍ରୟସ୍ଥଳୀ ନିର୍ମାଣ ପାଇଁ ୨୮,୬୫୧ଟି ପଲିଥିନ୍ ଶୀଟ୍ ବଣ୍ଟନ କରାଯାଇଛି। ଗୃହପାଳିତ ପଶୁଙ୍କ ସୁରକ୍ଷା ଓ ଖାଦ୍ୟ ପାଇଁ ୪,୧୨୭ ମେଟ୍ରିକ୍ ଟନ୍ ଗୋଖାଦ୍ୟ ଯୋଗାଇ ଦିଆଯାଇଛି। ବିଧାନସଭାରେ ରାଜସ୍ୱ ମନ୍ତ୍ରୀ ସୁରେଶ ପୂଜାରୀଙ୍କ ଏହି ଲିଖିତ ଉତ୍ତରରୁ ବନ୍ୟାର ସାଂଘାତିକ ଚିତ୍ର ସହ ସରକାରଙ୍କ ପୁନରୁଦ୍ଧାର ଓ ରିଲିଫ କାର୍ଯ୍ୟ ସମ୍ପର୍କରେ ସ୍ପଷ୍ଟ ସୂଚନା ମିଳିଛି।
