ଗଜପତି (ମନୋଜ ପାଢ଼ୀ):ରାଜ୍ୟର ଶିକ୍ଷା ବ୍ୟବସ୍ଥା ସମ୍ପର୍କିତ ବିଭିନ୍ନ ପ୍ରସଙ୍ଗ ଓ ସମସ୍ୟାକୁ ନେଇ ବିଜୁ ଜନତା ଦଳ (ବିଜେଡି)ର ଯୁବ ଓ ଛାତ୍ର ସଂଗଠନ ପକ୍ଷରୁ ଭୁବନେଶ୍ୱରରେ ବିକ୍ଷୋଭ ଏବଂ ବିଧାନସଭା ଘେରାଉ କାର୍ଯ୍ୟକ୍ରମ ଆୟୋଜିତ ହୋଇଥିଲା।
ଏହି ଆନ୍ଦୋଳନରେ ପାରଳାଖେମୁଣ୍ଡି ବିଧାୟକ ରୂପେଶ କୁମାର ପାଣିଗ୍ରାହୀ, ରାଜ୍ୟ ବିଜେଡି ଯୁବ ସଭାପତି ଚିନ୍ମୟ ଶତପଥୀଙ୍କ ସମେତ ବିଜେଡିର ବିଭିନ୍ନ ବିଧାୟକ ଓ ଦଳୀୟ ନେତାମାନେ ଉପସ୍ଥିତ ଥିଲେ। ଗଜପତି ଜିଲ୍ଲାରୁ ମଧ୍ୟ ବିଜେଡି ଯୁବ ଓ ଛାତ୍ର ନେତା, କର୍ମୀ ଏବଂ ସମର୍ଥକମାନେ ଏହି ଆନ୍ଦୋଳନରେ ସାମିଲ ହୋଇଥିଲେ।
ଗଜପତି ଜିଲ୍ଲା ବିଜେଡି ଯୁବ ସଭାପତି ଲେଙ୍କା ସିମାଦ୍ରି, ଗୁମ୍ମା ବ୍ଲକ ବିଜେଡି ଯୁବ ସଭାପତି ସୋନ୍ତସ କୁମାର ଦଣ୍ଡସେନା, ପ୍ରିତମ ପାଲଙ୍କ ସମେତ ବହୁ ଯୁବ ଓ ଛାତ୍ର କର୍ମୀ ଏଥିରେ ଯୋଗଦେଇଥିଲେ।
ଲଗାଣ ବର୍ଷାକୁ ଖାତିର ନକରି ଆନ୍ଦୋଳନକାରୀମାନେ ଏକାଠି ହୋଇ ବିଭିନ୍ନ ନାରା ଦେଇଥିଲେ। ବିଶେଷକରି ଗଣଶିକ୍ଷା ମନ୍ତ୍ରୀଙ୍କ ଇସ୍ତଫା ଦାବି ସହିତ ରାଜ୍ୟର ଶିକ୍ଷା କ୍ଷେତ୍ରରେ ରହିଥିବା ବିଭିନ୍ନ ସମସ୍ୟା, ଛାତ୍ରଛାତ୍ରୀଙ୍କ ସମସ୍ୟା ଏବଂ ଶିକ୍ଷା ବ୍ୟବସ୍ଥା ସମ୍ପର୍କିତ ପ୍ରସଙ୍ଗ ଉଠାଇ ସରକାରଙ୍କ ଦୃଷ୍ଟି ଆକର୍ଷଣ କରାଯାଇଥିଲା।
ଆନ୍ଦୋଳନ ସମୟରେ ଯୁବ ଓ ଛାତ୍ର କର୍ମୀମାନେ ବିଭିନ୍ନ ଦାବି ନେଇ ସ୍ଲୋଗାନ ଦେବା ସହ ଶିକ୍ଷା କ୍ଷେତ୍ରର ସମସ୍ୟାଗୁଡ଼ିକର ସମାଧାନ ଏବଂ ସରକାରଙ୍କ ପକ୍ଷରୁ ତୁରନ୍ତ ପଦକ୍ଷେପ ନେବାକୁ ଦାବି କରିଥିଲେ।
ବିଧାୟକ ରୂପେଶ କୁମାର ପାଣିଗ୍ରାହୀଙ୍କ ଉପସ୍ଥିତି ଆନ୍ଦୋଳନରେ ଗଜପତି ଜିଲ୍ଲାର ଦଳୀୟ ପ୍ରତିନିଧିତ୍ୱକୁ ଦର୍ଶାଇଥିଲା। ବର୍ଷା ସତ୍ତ୍ୱେ ଗଜପତି ଜିଲ୍ଲାରୁ ବହୁ ସଂଖ୍ୟକ ଯୁବ ଓ ଛାତ୍ର କର୍ମୀଙ୍କ ଯୋଗଦାନ ଦେଖିବାକୁ ମିଳିଥିଲା।
ବିଧାନସଭା ଘେରାଉ କାର୍ଯ୍ୟକ୍ରମକୁ ଦୃଷ୍ଟିରେ ରଖି ଭୁବନେଶ୍ୱରରେ ପୋଲିସ ପକ୍ଷରୁ ମଧ୍ୟ ଆବଶ୍ୟକ ସୁରକ୍ଷା ବ୍ୟବସ୍ଥା କରାଯାଇଥିଲା।
