ଭୁବନେଶ୍ଵର: ଆଞ୍ଚଳିକ ଶିକ୍ଷା ପ୍ରତିଷ୍ଠାନ (RIE), ଏନ୍ସିଇଆର୍ଟି, ଭୁବନେଶ୍ୱର ପକ୍ଷରୁ ଏନ୍ସିଇଆର୍ଟି, ନୂଆଦିଲ୍ଲୀର ଶିକ୍ଷା ମନୋବିଜ୍ଞାନ ଓ ଶିକ୍ଷାର ମୌଳିକ ଭିତ୍ତି ବିଭାଗ (DEPFE) ଅଧୀନସ୍ଥ ମନୋଦର୍ପଣ ସେଲ୍ର ସହଯୋଗରେ ୧୦ ଅକ୍ଟୋବର ୨୦୨୬ରେ ବିଶ୍ୱ ମାନସିକ ସ୍ୱାସ୍ଥ୍ୟ ଦିବସ ପାଳନ କରାଯାଇଥିଲା। ଚଳିତ ବର୍ଷର ବିଷୟବସ୍ତୁ “ଅନୁଭୂତିର ସ୍ୱର ଶୁଣିବା: ପ୍ରକୃତ ଅନୁଭବ, ପ୍ରକୃତ ପରିବର୍ତ୍ତନ” ଆଧାରରେ ଆୟୋଜିତ ଏହି କାର୍ଯ୍ୟକ୍ରମର ଉଦ୍ଦେଶ୍ୟ ଥିଲା ମାନସିକ ସ୍ୱାସ୍ଥ୍ୟ ସମ୍ପର୍କରେ ସଚେତନତା ବୃଦ୍ଧି, ଭାବନାତ୍ମକ ସୁସ୍ଥତାର ପ୍ରସାର ଏବଂ ଶିକ୍ଷା କ୍ଷେତ୍ରରେ ସହାନୁଭୂତି, ପରାମର୍ଶ ଓ ମାନସିକ ସହାୟତାର ଗୁରୁତ୍ୱ ସମ୍ପର୍କରେ ସଚେତନ କରିବା।
କାର୍ଯ୍ୟକ୍ରମକୁ ଆଞ୍ଚଳିକ ଶିକ୍ଷା ପ୍ରତିଷ୍ଠାନ, ଏନ୍ସିଇଆର୍ଟି, ଭୁବନେଶ୍ୱରର ଅଧ୍ୟକ୍ଷ ପ୍ରଫେସର ଲକ୍ଷ୍ମୀଧର ବେହେରା ଉଦ୍ଘାଟନ କରିଥିଲେ। ନିଜ ଉଦ୍ଘାଟନୀ ଅଭିଭାଷଣରେ ସେ ଶିକ୍ଷାନୁଷ୍ଠାନଗୁଡ଼ିକରେ ମାନସିକ ସ୍ୱାସ୍ଥ୍ୟ, ଭାବନାତ୍ମକ ସୁସ୍ଥତା ଓ ପରାମର୍ଶର ଗୁରୁତ୍ୱ ଉପରେ ଆଲୋକପାତ କରିଥିଲେ। ଶିକ୍ଷାର୍ଥୀମାନଙ୍କ ମାନସିକ ସୁସ୍ଥତା ନିମନ୍ତେ ଏକ ସହାୟକ, ଅନ୍ତର୍ଭୁକ୍ତିମୂଳକ ଓ ନିରାପଦ ଶିକ୍ଷଣ ପରିବେଶ ଗଠନ କରିବାରେ ଶିକ୍ଷକ ଏବଂ ଶିକ୍ଷକ ଶିକ୍ଷା ପ୍ରତିଷ୍ଠାନଗୁଡ଼ିକର ଗୁରୁତ୍ୱପୂର୍ଣ୍ଣ ଭୂମିକା ରହିଥିବା ସେ ଉଲ୍ଲେଖ କରିଥିଲେ। ପ୍ରାକ୍-ସେବା ଶିକ୍ଷକ ଶିକ୍ଷାରେ ସ୍ୱାସ୍ଥ୍ୟ ଓ ସୁସ୍ଥତାକୁ ସମନ୍ୱିତ କରିବା ନିମନ୍ତେ ୟୁନେସ୍କୋ ଦକ୍ଷିଣ ଏସିଆ ସହ ସ୍ୱାକ୍ଷରିତ ବୁଝାମଣାପତ୍ର ସମ୍ପର୍କରେ ମଧ୍ୟ ସେ ଉଲ୍ଲେଖ କରିଥିଲେ। ଏହା ଶିକ୍ଷାର୍ଥୀମାନଙ୍କ ମାନସିକ ସ୍ୱାସ୍ଥ୍ୟ ଓ ସୁସ୍ଥତା ସମ୍ବନ୍ଧୀୟ ଆବଶ୍ୟକତାକୁ ସମ୍ବେଦନଶୀଳତାର ସହ ବୁଝିବା ଓ ପୂରଣ କରିବା ପାଇଁ ଶିକ୍ଷକମାନଙ୍କୁ ପ୍ରସ୍ତୁତ କରିବାରେ ପ୍ରତିଷ୍ଠାନର ପ୍ରତିବଦ୍ଧତାକୁ ପ୍ରତିଫଳିତ କରେ।
ଏହି ଅବସରରେ “ପ୍ରତ୍ୟେକ ଶିକ୍ଷାର୍ଥୀ ଗୁରୁତ୍ୱପୂର୍ଣ୍ଣ: ସେମାନଙ୍କ ମନର କଥା ଶୁଣିବା ଓ ଯେଉଁମାନଙ୍କର ସହାୟତା ଆବଶ୍ୟକ, ସେମାନଙ୍କ ସହ ଯୋଡ଼ିହେବା” ଶୀର୍ଷକରେ ଏକ ବିଶେଷ ଅଭିଭାଷଣ ପ୍ରଦାନ କରିଥିଲେ ଦିଲ୍ଲୀ ବିଶ୍ୱବିଦ୍ୟାଳୟ ଓ ଉତ୍କଳ ବିଶ୍ୱବିଦ୍ୟାଳୟର ପୂର୍ବତନ ମନୋବିଜ୍ଞାନ ପ୍ରଫେସର ଉଦୟ ନାଥ ଦାଶ। ତାଙ୍କ ଅଭିଭାଷଣରେ ଶିକ୍ଷାର୍ଥୀ ଓ ଶିକ୍ଷକମାନଙ୍କ ମଧ୍ୟରେ ମାନସିକ ସ୍ୱାସ୍ଥ୍ୟ ସଚେତନତା ଏବଂ ସୁସ୍ଥତାର ପ୍ରସାର ଉପରେ ଗୁରୁତ୍ୱ ଦିଆଯାଇଥିଲା। ସମୟ ପରିଚାଳନା, ଶିକ୍ଷକଙ୍କ ଶୃଙ୍ଖଳା, ନିରନ୍ତର ବୃତ୍ତିଗତ ବିକାଶ ଏବଂ ଜଟିଳ ବିଷୟବସ୍ତୁକୁ ସରଳ ଓ ସହଜବୋଧ୍ୟ ଭାବରେ ଉପସ୍ଥାପନ କରିବାର ଗୁରୁତ୍ୱ ସେ ବୁଝାଇଥିଲେ। କିଶୋରାବସ୍ଥାର ମନୋବୈଜ୍ଞାନିକ ଦିଗ ଏବଂ ଶିକ୍ଷାର୍ଥୀ, ଶିକ୍ଷକ ଓ ଅଭିଭାବକମାନେ ସମ୍ମୁଖୀନ ହେଉଥିବା ଖାପଖୁଆଇ ଚଳିବା ସମ୍ବନ୍ଧୀୟ ସମସ୍ୟାଗୁଡ଼ିକ ଉପରେ ମଧ୍ୟ ସେ ଆଲୋଚନା କରିଥିଲେ। ପରାମର୍ଶ ଏକ ଗତିଶୀଳ, ସମ୍ବେଦନଶୀଳ ଓ ବ୍ୟକ୍ତିକୈନ୍ଦ୍ରିକ ପ୍ରକ୍ରିୟା ବୋଲି ଉଲ୍ଲେଖ କରି ସେ ମନୋଯୋଗପୂର୍ବକ ଶୁଣିବା,ଭାବନାକୁ ବୁଝିବା ଓ ପ୍ରତିଫଳିତ କରିବା, ବ୍ୟକ୍ତିଗତ ପାର୍ଥକ୍ୟକୁ ସମ୍ମାନ ଦେବା ଏବଂ ଅର୍ଥପୂର୍ଣ୍ଣ ଆନ୍ତଃବ୍ୟକ୍ତିକ ସମ୍ପର୍କ ଗଢ଼ିବାର ଆବଶ୍ୟକତା ଉପରେ ଆଲୋକପାତ କରିଥିଲେ।
ପ୍ରତିଷ୍ଠାନର ଡିନ୍ ପ୍ରଫେସର ମାନସୀ ଗୋସ୍ୱାମୀ ଶିକ୍ଷାର୍ଥୀମାନଙ୍କ ସାମଗ୍ରିକ ବିକାଶର ଗୁରୁତ୍ୱ ଉପରେ ମତବ୍ୟକ୍ତ କରିଥିଲେ। ଶିକ୍ଷାର୍ଥୀମାନଙ୍କ ମଧ୍ୟରେ ଆତ୍ମବିଶ୍ୱାସ, କରୁଣା, ସହାନୁଭୂତି ଓ ଆତ୍ମସଂଯମର ବିକାଶ ଦିଗରେ ଶିକ୍ଷକମାନେ ଯତ୍ନବାନ ହେବାକୁ ସେ ଆହ୍ୱାନ ଦେଇଥିଲେ। ବିସ୍ତାର ଶିକ୍ଷା ବିଭାଗର ଭାରପ୍ରାପ୍ତ ମୁଖ୍ୟ ପ୍ରଫେସର ରାମକାନ୍ତ ମହାଳିକ ମନୋଦର୍ପଣ ସେଲ୍ ଦ୍ୱାରା ପରିଚାଳିତ ବିଭିନ୍ନ ପଦକ୍ଷେପ, ବିଶେଷକରି ‘ସହଯୋଗ’ ଓ ‘ପରିଚର୍ଚ୍ଚା’ କାର୍ଯ୍ୟକ୍ରମ ସମ୍ପର୍କରେ ଆଲୋକପାତ କରିଥିଲେ।
କାର୍ଯ୍ୟକ୍ରମର ସଂଯୋଜନା କରିଥିଲେ ଆଞ୍ଚଳିକ ଶିକ୍ଷା ପ୍ରତିଷ୍ଠାନ, ଭୁବନେଶ୍ୱରର ଶିକ୍ଷା ବିଭାଗର ପ୍ରଫେସର ଶଙ୍କର ପ୍ରସାଦ ମହାନ୍ତି । ଏହି କାର୍ଯ୍ୟକ୍ରମରେ ପିଏମ୍ ଶ୍ରୀ ଡିଏମ୍ ସ୍କୁଲ୍ ର ଶିକ୍ଷକ, ଆଇଟିଇପି, ବି.ଏଡ୍., ଏମ୍.ଏଡ୍ ଓ ପିଏଚ୍.ଡି. ପାଠ୍ୟକ୍ରମର ଶିକ୍ଷାର୍ଥୀ, ବିଭିନ୍ନ ବିଭାଗର ମୁଖ୍ୟ, ଅଧ୍ୟାପକ-ଅଧ୍ୟାପିକା ଏବଂ ପ୍ରତିଷ୍ଠାନର କର୍ମଚାରୀମାନେ ସାମିଲ ଥିଲେ। ସେମାନଙ୍କ ସକ୍ରିୟ ଅଂଶଗ୍ରହଣ ଏକ ମାନସିକ ଭାବେ ସୁସ୍ଥ, ସହାନୁଭୂତିଶୀଳ, ଅନ୍ତର୍ଭୁକ୍ତିମୂଳକ ଓ ସହାୟକ ଶିକ୍ଷା ପରିବେଶ ଗଠନ ପ୍ରତି ଶିକ୍ଷା ସମୁଦାୟର ସାମୂହିକ ପ୍ରତିବଦ୍ଧତାକୁ ପ୍ରତିଫଳିତ କରିଥିଲା। ଏହି ଦିବସର ପାଳନ ମାଧ୍ୟମରେ ଶିକ୍ଷାର୍ଥୀ ଓ ଶିକ୍ଷକମାନଙ୍କ ଅନୁଭବକୁ ମନୋଯୋଗର ସହ ଶୁଣିବା, ସେମାନଙ୍କ ମାନସିକ ଆବଶ୍ୟକତାକୁ ବୁଝିବା, ପରାମର୍ଶ ଓ ସହାୟତା ବ୍ୟବସ୍ଥାକୁ ସୁଦୃଢ଼ କରିବା ଏବଂ ଶିକ୍ଷାନୁଷ୍ଠାନଗୁଡ଼ିକରେ ସହାନୁଭୂତି, ସମ୍ବେଦନଶୀଳତା ଓ ମାନସିକ ସୁସ୍ଥତାର ସଂସ୍କୃତି ଗଢ଼ିତୋଳିବାର ଆବଶ୍ୟକତା ପୁନର୍ବାର ପ୍ରତିପାଦିତ ହୋଇଥିଲା।
