ଭୁବନେଶ୍ୱର: ଭୁବନେଶ୍ୱର ୟୁନିଟ୍-୩ସ୍ଥିତ ପ୍ରଦର୍ଶନୀ ପଡ଼ିଆଠାରେ ଆରମ୍ଭ ହୋଇଛି ଜାତୀୟ ଜନଜାତି ଶିଳ୍ପ ମେଳା ଏବଂ ଜାତୀୟ ଜନଜାତି ନୃତ୍ୟ ମହୋତ୍ସବ। ଶୁକ୍ରବାର ସନ୍ଧ୍ୟାରେ ଏହାକୁ ଅନୁସୂଚିତ ଜନଜାତି ଓ ଅନୁସୂଚିତ ଜାତି ଉନ୍ନୟନ, ସଂଖ୍ୟାଲଘୁ ସଂପ୍ରଦାୟ ଓ ପଛୁଆବର୍ଗ କଲ୍ୟାଣ ବିଭାଗର ମନ୍ତ୍ରୀ ଜଗନ୍ନାଥ ସାରକା ଉଦଘାଟନ କରିଛନ୍ତି। ଏଥିରେ ଓଡ଼ିଶା ସହିତ ବିଭିନ୍ନ ରାଜ୍ୟର ଜନଜାତି ଶିଳ୍ପୀ ଓ କଳାକାରମାନେ ଭାଗ ନେଇଛନ୍ତି।
‘‘ଜନଜାତିଙ୍କ ଜୀବନ ଓ ଅନନ୍ୟ କଳା ସଂସ୍କୃତିର ଏକ ବିଶେଷ ଆକର୍ଷଣ ରହିଛି। ବର୍ତ୍ତମାନ ସମୟରେ ଜନଜାତି ବର୍ଗର ଯୁବପିଢ଼ି, ଛାତ୍ରଛାତ୍ରୀ ବିଭିନ୍ନ କ୍ଷେତ୍ରରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି। ଜନଜାତିଙ୍କ ବିଷୟରେ ଜାଣିବା ଓ ଅନ୍ୟମାନଙ୍କୁ ଜଣାଇବା ପାଇଁ ଗବେଷକମାନଙ୍କ ଭିତରେ ଉତ୍ସାହ ବଢ଼ିଛି। ଓଡ଼ିଶାରେ ଏଭଳି ଏକ ଜାତୀୟ ସ୍ତରର କାର୍ଯ୍ୟକ୍ରମ ଆୟୋଜନ ହେବା ଫଳରେ ବିଭିନ୍ନ ରାଜ୍ୟର ଜନଜାତି ଗୋଟିଏ ଜାଗାରେ ଏକାଠି ହୋଇପାରିଛନ୍ତି। ଏଭଳି କାର୍ଯ୍ୟକ୍ରମ ସେମାନଙ୍କୁ ଆଗକୁ ଯିବାରେ ପ୍ରେରଣା ଦେବ’’, କହିଛନ୍ତି ମନ୍ତ୍ରୀ ଜଗନ୍ନାଥ ସାରକା।
ଭାରତ ସରକାରଙ୍କ ଜନଜାତି ବ୍ୟାପାର ମନ୍ତ୍ରାଳୟ ସହଯୋଗରେ ଏବଂ ରାଜ୍ୟ ଅନୁସୂଚିତ ଜାତି ଓ ଅନୁସୂଚିତ ଜନଜାତି ଗବେଷଣା ପ୍ରତିଷ୍ଠାନ ପକ୍ଷରୁ ଏହି ଜାତୀୟ ସ୍ତରୀୟ କାର୍ଯ୍ୟକ୍ରମ ଆୟୋଜନ କରାଯାଉଛି। ଏଥିରେ ସମ୍ମାନିତ ଅତିଥି ଭାବେ ବିଭାଗୀୟ ସଚିବ ରୂପାରୋଶନ ସାହୁ ଯୋଗଦେଇ ଏଭଳି କାର୍ଯ୍ୟକ୍ରମ ଜନଜାତି ଶିଳ୍ପୀ ଓ କଳାକାରଙ୍କ ଭିତରେ ଆତ୍ମବିଶ୍ୱାସ ବୃଦ୍ଧି କରିବାରେ ସହାୟକ ହେବ ବୋଲି କହିଥିଲେ।
ଓଡ଼ିଶା ଏବଂ ବିଭିନ୍ନ ରାଜ୍ୟର ଜନଜାତି ଶିଳ୍ପୀଙ୍କ ଦ୍ୱାରା ପ୍ରସ୍ତୁତ ଅନନ୍ୟ କଳାକୃତିର ବିଶେଷ ଆକର୍ଷଣ ରହିଛି। ଏହାର ପ୍ରଦର୍ଶନ ଓ ବିକ୍ରି ପାଇଁ ଭୁବନେଶ୍ୱରଠାରେ ଆୟୋଜନ କରାଯାଇଛି ଜାତୀୟ ଜନଜାତି ଶିଳ୍ପ ମେଳା। ଏଥିରେ ୧୨ଟି ରାଜ୍ୟର ୨୦୦ରୁ ଅଧିକ ଜନଜାତି କାରିଗର ସେମାନଙ୍କ ହାତ ତିଆରି ଉତ୍ପାଦର ପ୍ରଦର୍ଶନ ଓ ବିକ୍ରି କରୁଛନ୍ତି। ୭୦ରୁ ଅଧିକ ଷ୍ଟଲରେ ଜନଜାତି ଅଳଙ୍କାର, ଆକର୍ଷଣୀୟ ପୋଷାକ, ବାଉଁଶ ଓ ଲୌହ ସାମଗ୍ରୀ ସହିତ ଢୋକ୍ରା, ଟେରାକୋଟା ଏବଂ ସବାଇ ଘାସରୁ ପ୍ରସ୍ତୁତ ବିଭିନ୍ନ ଉତ୍ପାଦ ଆଦି ଆକର୍ଷଣ ପାଲଟିଛି।
ହି ପରିପ୍ରେକ୍ଷୀରେ ଜନଜାତି ବର୍ଗଙ୍କ ସମୃଦ୍ଧ କଳା ଓ ସଂସ୍କୃତିର ପ୍ରସାର ପାଇଁ ଜାତୀୟ ଜନଜାତି ନୃତ୍ୟ ମହୋତ୍ସବ ଆରମ୍ଭ ହୋଇଛି। ଏଥିରେ ଓଡ଼ିଶା ସହିତ ୧୩ଟି ରାଜ୍ୟରୁ ଆସିଥିବା ଜନଜାତି କଳାକାରମାନେ ସେମାନଙ୍କ ନୃତ୍ୟ ପ୍ରତିଭା ପ୍ରଦର୍ଶନ କରୁଛନ୍ତି। ପ୍ରଥମ ଦିନରେ ଅରୁଣାଚଳପ୍ରଦେଶର ମିସିମି ଜନଜାତିଙ୍କ ପକ୍ଷରୁ ଲୋକନୃତ୍ୟ, ଗୁଜରାଟର କୁନ୍ ଜନଜାତିଙ୍କ କାହାଡ଼ିଆ ନୃତ୍ୟ, ତ୍ରିପୁରୀ ଜନଜାତିଙ୍କ ଲେବାଙ୍ଗ ବୁମାନି ନୃତ୍ୟ, ମହାରାଷ୍ଟ୍ରର ଗଣ୍ଡ ଜନଜାତିଙ୍କ ଖାପରି ନୃତ୍ୟ, ଓଡ଼ିଶାର ଗଦବା ଜନଜାତିଙ୍କ ଢ଼େମ୍ସା ନୃତ୍ୟ ଆଦି ଦର୍ଶକଙ୍କ ମନ ମୁଗ୍ଧ କରିଥିଲା। ଏହି ନୃତ୍ୟ ମହୋତ୍ସବ ଜାନୁଆରି ୭ ତାରିଖ ଯାଏଁ ଚାଲିବ।
ଏହି କାର୍ଯ୍ୟକ୍ରମରେ ବିଭାଗୀୟ ନିର୍ଦ୍ଦେଶକ ଇନ୍ଦ୍ରମଣି ତ୍ରିପାଠୀ ଯୋଗଦେଇ ସମସ୍ତଙ୍କୁ ସ୍ୱାଗତ କରିଥିଲେ। ବିଭିନ୍ନ ରାଜ୍ୟରୁ ଆସିଥିବା ଜନଜାତି କାରିଗର ଓ କଳାକାରମାନଙ୍କୁ ଉତ୍ସାହିତ କରିବା ପାଇଁ ବିଭାଗ ତରଫରୁ ସେ ଜନସାଧାରଣଙ୍କୁ ଅନୁରୋଧ କରିଛନ୍ତି। ଏହି ଅବସରରେ ଏକ କଫିଟେବୁଲ ବୁକ୍ ଉନ୍ମୋଚନ କରାଯାଇଥିଲା। ଏଥିରେ ଆଦିବାସୀଙ୍କ ଜୀବନ, ସଂସ୍କୃତି ଓ ପରମ୍ପରାକୁ ନେଇ ଜନଜାତି ଯୁବଶିଳ୍ପୀମାନେ ଆଙ୍କିଥିବା ବିଭିନ୍ନ ଆକର୍ଷଣୀୟ ଚିତ୍ରକଳା ସ୍ଥାନ ପାଇଛି। କାର୍ଯ୍ୟକ୍ରମରେ ଅନ୍ୟମାନଙ୍କ ଭିତରେ ଏସଏସଟିଆରଟିଆଇ ଉପନିର୍ଦ୍ଦେଶକ ସନ୍ତୋଷ ରଥ ଏବଂ ଓଏସଡି ସମରେନ୍ଦ୍ର ଭୁତିଆ ଯୋଗ ଦେଇଥିଲେ।
Comments are closed.