ନିଉଦିଲ୍ଲୀ ; ଆପଣ ICICI ବ୍ୟାଙ୍କରେ NRI ସଞ୍ଚୟ ଖାତା ଖୋଲିଛନ୍ତି କି? ତେବେ ଡିସେମ୍ବର ୧, ୨୦୨୬ରୁ ଆପଣଙ୍କୁ ଦେବାକୁ ପଡ଼ିପାରେ ଅଧିକ ସର୍ଭିସ୍ ଚାର୍ଜ। ନଗଦ ଜମା, ଟଙ୍କା ଉଠାଣ ଏବଂ ବିଫଳ ECS ପେମେଣ୍ଟ ପାଇଁ ଶୁଳ୍କ ସଂଶୋଧନ କରିଛି ବ୍ୟାଙ୍କ। ନୂଆ ନିୟମ ଅନୁସାରେ, ମାଗଣା କାରବାର ସୀମା ଅତିକ୍ରମ କଲେ ଗ୍ରାହକଙ୍କ ପକେଟ୍ ଉପରେ ପଡ଼ିବ ଅତିରିକ୍ତ ବୋଝ। ତେବେ କେଉଁ ଗ୍ରାହକଙ୍କୁ କେତେ ଶୁଳ୍କ ଦେବାକୁ ପଡ଼ିବ? ପ୍ରିମିୟମ୍ ଗ୍ରାହକଙ୍କୁ ମିଳିବ କି ଅଧିକ ରିହାତି? ଜାଣନ୍ତୁ ସମ୍ପୂର୍ଣ୍ଣ ତଥ୍ୟ।
ବ୍ୟାଙ୍କିଂ ସେବାରେ ପରିବର୍ତ୍ତନ ଗ୍ରାହକଙ୍କ ଦୈନନ୍ଦିନ ଆର୍ଥିକ କାରବାରକୁ ପ୍ରଭାବିତ କରିଥାଏ। ଏବେ ICICI ବ୍ୟାଙ୍କ ନିଜର ଅଣ-ଆବାସୀ ଭାରତୀୟ (NRI) ସଞ୍ଚୟ ଖାତା ସହ ଜଡ଼ିତ କିଛି ସେବା ଶୁଳ୍କରେ ପରିବର୍ତ୍ତନ ଆଣିଛି। ଏହି ସଂଶୋଧିତ ଶୁଳ୍କ ୧ ଡିସେମ୍ବର ୨୦୨୬ରୁ କାର୍ଯ୍ୟକାରୀ ହେବ।
ନୂଆ ନିୟମ ଅନୁସାରେ, ମାଗଣା କାରବାର ସୀମା ଅତିକ୍ରମ କଲେ ପ୍ରତି ୧,୦୦୦ ଟଙ୍କା ପାଇଁ ୪ ଟଙ୍କା ଶୁଳ୍କ ଦେବାକୁ ପଡ଼ିବ। ପୂର୍ବରୁ ଏହି ଶୁଳ୍କ ୩.୫୦ ଟଙ୍କା ଥିଲା। ତେବେ ସର୍ବନିମ୍ନ ଶୁଳ୍କ ୧୫୦ ଟଙ୍କା ରଖାଯାଇଛି।
ପ୍ରିମିୟମ୍ NRI ଗ୍ରାହକଙ୍କୁ ମିଳିବ ଅଧିକ ରିହାତି
ସମସ୍ତ NRI ଗ୍ରାହକଙ୍କ ପାଇଁ ନିୟମ ସମାନ ନୁହେଁ। NRI Private Banking ଏବଂ ଅନ୍ୟ କେତେକ ପ୍ରିମିୟମ୍ ବର୍ଗର ଗ୍ରାହକଙ୍କୁ ଅଧିକ ମାଗଣା କାରବାର ସୁବିଧା ମିଳିବ।
ଏହି ସୁବିଧା ପାଇବାକୁ ଗ୍ରାହକଙ୍କୁ ବ୍ୟାଙ୍କ ସହ ଅତି କମରେ ୧ କୋଟି ଟଙ୍କାର ମୋଟ ସମ୍ପର୍କ ମୂଲ୍ୟ (Total Relationship Value) ବଜାୟ ରଖିବାକୁ ହେବ। ଅନ୍ୟଥା, ଗତ ତିନି ମାସ ମଧ୍ୟରୁ ଯେକୌଣସି ଗୋଟିଏ ମାସରେ ଆକାଉଣ୍ଟରେ ୨୫ ଲକ୍ଷ ଟଙ୍କା କିମ୍ବା ତା’ଠାରୁ ଅଧିକ ଜମା ଓ ବାଲାନ୍ସ ରହିବା ଆବଶ୍ୟକ।
ଏଭଳି ଯୋଗ୍ୟ ଗ୍ରାହକଙ୍କୁ ପ୍ରତି ମାସରେ ମୋଟ ୧୫ଟି ନଗଦ କାରବାର ମାଗଣା ମିଳିବ। ଏଥିସହ ନଗଦ ଜମା ଓ ଉଠାଣ ପାଇଁ ୧୫ ଲକ୍ଷ ଟଙ୍କା ପର୍ଯ୍ୟନ୍ତ ପୃଥକ ମାଗଣା ସୀମା ରହିବ।
ଏହି ସୀମା ଅତିକ୍ରମ କଲେ ପ୍ରତି ୧,୦୦୦ ଟଙ୍କା ପାଇଁ ୪ ଟଙ୍କା କିମ୍ବା ସର୍ବନିମ୍ନ ୧୫୦ ଟଙ୍କା ଶୁଳ୍କ ଦେବାକୁ ପଡ଼ିବ।
ECS ପେମେଣ୍ଟ ବିଫଳ ହେଲେ ବଢ଼ିବ ଜରିମାନା
ନଗଦ କାରବାର ସହିତ ECS ପେମେଣ୍ଟ ବିଫଳ ହେଲେ ମଧ୍ୟ ଅଧିକ ଶୁଳ୍କ ଦେବାକୁ ପଡ଼ିବ। ପୂର୍ବରୁ ଏଥିପାଇଁ ୫୦୦ ଟଙ୍କା ଶୁଳ୍କ ଥିବାବେଳେ ଏବେ ଏହାକୁ ୫୫୦ ଟଙ୍କା କରାଯାଇଛି।
ECS ଅର୍ଥାତ୍ Electronic Clearing Service ହେଉଛି ଏକ ସ୍ୱୟଂଚାଳିତ ପେମେଣ୍ଟ ବ୍ୟବସ୍ଥା। ଏହା ମାଧ୍ୟମରେ ଗ୍ରାହକଙ୍କ ଆକାଉଣ୍ଟରୁ EMI, ବୀମା ପ୍ରିମିୟମ୍ ଏବଂ ଅନ୍ୟାନ୍ୟ ନିୟମିତ ଦେୟ ଆପେଆପେ କଟିଥାଏ।
କିନ୍ତୁ ଆକାଉଣ୍ଟରେ ପର୍ଯ୍ୟାପ୍ତ ଟଙ୍କା ନଥିଲେ କିମ୍ବା ଅନ୍ୟ ଆର୍ଥିକ କାରଣରୁ ପେମେଣ୍ଟ ବିଫଳ ହେଲେ ଗ୍ରାହକଙ୍କୁ ୫୫୦ ଟଙ୍କା ଶୁଳ୍କ ଦେବାକୁ ପଡ଼ିବ। ତେଣୁ EMI ଓ ବୀମା କିସ୍ତି ଭଳି ନିୟମିତ ଦେୟ ପୂର୍ବରୁ ଆକାଉଣ୍ଟରେ ପର୍ଯ୍ୟାପ୍ତ ବାଲାନ୍ସ ରଖିବା ଜରୁରୀ।
ICICI ବ୍ୟାଙ୍କର ବିଭିନ୍ନ ବର୍ଗର NRI ସଞ୍ଚୟ ଖାତା ପାଇଁ ଏହି ସଂଶୋଧିତ ଶୁଳ୍କ ନିୟମ ଲାଗୁ ହେବ। ଏଥିରେ NRI Private Banking, NRI Premium, NRI Select, NRI Pro, NRI Regular ସହିତ Seafarer, Virtue ଏବଂ NRI Sparsh ଭଳି ଆକାଉଣ୍ଟ ସାମିଲ ରହିଛି। ଏହି ସମସ୍ତ ଆକାଉଣ୍ଟଧାରୀଙ୍କୁ ଡିସେମ୍ବର ୧, ୨୦୨୬ରୁ ନୂଆ ଶୁଳ୍କ ନିୟମ ଅନୁସାରେ ବ୍ୟାଙ୍କିଂ ସେବା ଗ୍ରହଣ କରିବାକୁ ପଡ଼ିବ।
ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ପରିବର୍ତ୍ତନ କେବଳ ନୂଆ ଆକାଉଣ୍ଟଧାରୀଙ୍କ ପାଇଁ ସୀମିତ ନୁହେଁ। ୪ ଅଗଷ୍ଟ ୨୦୨୫ ପୂର୍ବରୁ ଖୋଲାଯାଇଥିବା ଆକାଉଣ୍ଟଗୁଡ଼ିକରେ ମଧ୍ୟ ଏହା ଲାଗୁ ହେବ।
ନୂଆ ଶୁଳ୍କ ଲାଗୁ ହେବା ପୂର୍ବରୁ NRI ଗ୍ରାହକମାନେ ନିଜ ଆକାଉଣ୍ଟର ପ୍ରକାର, ମାଗଣା କାରବାର ସୀମା ଏବଂ ବ୍ୟାଙ୍କରେ ନିଜର ଯୋଗ୍ୟତା ଯାଞ୍ଚ କରିନେବା ଉଚିତ। ବିଶେଷକରି ନଗଦ କାରବାର ଅଧିକ କରୁଥିବା ଗ୍ରାହକ ଏବଂ ECS ମାଧ୍ୟମରେ ନିୟମିତ ପେମେଣ୍ଟ କରୁଥିବା ଲୋକମାନେ ଏହି ପରିବର୍ତ୍ତନ ପ୍ରତି ସତର୍କ ରହିବା ଆବଶ୍ୟକ।
କାରଣ ଛୋଟ ଛୋଟ ଅତିରିକ୍ତ ଶୁଳ୍କ ମଧ୍ୟ ଦୀର୍ଘ ସମୟରେ ଗ୍ରାହକଙ୍କ ଖର୍ଚ୍ଚ ବଢ଼ାଇପାରେ। ତେଣୁ ଡିସେମ୍ବର ୧ରୁ ନୂଆ ନିୟମ ଲାଗୁ ହେବା ପୂର୍ବରୁ ICICI ବ୍ୟାଙ୍କର ସଂଶୋଧିତ ସର୍ଭିସ୍ ଚାର୍ଜ ତାଲିକା ଯାଞ୍ଚ କରିବା ହିଁ ବୁଦ୍ଧିମାନର କାମ।