ମୁମ୍ବାଇ: ଶିବସେନାର ଦୁଇଟି ଦଳ ଦ୍ୱାରା ଦଳର ପ୍ରତୀକ ଏବଂ ନାମ ଉପରେ ଦାବି ମଧ୍ୟରେ ନିର୍ବାଚନ ଆୟୋଗ ମଧ୍ୟବର୍ତ୍ତୀକାଳୀନ ନିଷ୍ପତ୍ତି ନେଇଛନ୍ତି। ନିର୍ବାଚନ କମିଶନ ଉଦ୍ଧବ ଠାକରେଙ୍କ ଦଳର ନାମ ‘ଶିବସେନା (ଉଦ୍ଧବ ବାଲାସାହେବ ଠାକରେ)’କୁ ଅନୁମୋଦନ କରିଥିବାବେଳେ ଏକନାଥ ସିନ୍ଦେଙ୍କ ଦଳର ନାମ ବାଲାସାହେବାଞ୍ଚେ ଶିବସେନା ହେବ ବୋଲି କହିଛନ୍ତି | କେବଳ ଏତିକି ନୁହେଁ, କମିଶନ ନିର୍ବାଚନୀ ଚିହ୍ନ ଭାବେ ଉଦ୍ଧବ ଠାକରେଙ୍କୁ ଜଳୁଥିବା ମଶାଲ ଚିହ୍ନ ଦେଇଥିବାବେଳେ ସିନ୍ଦେଙ୍କ ଶିବସେନାକୁ ୨ଟି ଖଣ୍ଡା ଓ ଢ଼ାଲ ଚିହ୍ନ ଦେଇଛନ୍ତି | ତେବେ ଏହାକୁ ନେଇ ଆଜି ଉଦ୍ଧବଙ୍କ ପୁଅ ତଥା ପୂର୍ବତନ ମନ୍ତ୍ରୀ ଆଦିତ୍ୟ ଠାକରେ ଏକନାଥ ସିନ୍ଦେଙ୍କ ଦଳ ଉପରେ ଆକ୍ରମଣ କରିଛନ୍ତି। ସେ କହିଛନ୍ତି ଯେ ଆମେ ପାଇଥିବା ନାମ ଦର୍ଶାଉଛି ଯେ ଏହି ନାମ ଶିବସେନାଠାରୁ ଭିନ୍ନ ନୁହେଁ।
ସେ କହିଛନ୍ତି ଯେ ୪୦ଜଣ ପ୍ରତାରଣାକାରୀ ଆମକୁ ପ୍ରତାରଣା କରି ଦଳକୁ ଛଡ଼େଇ ନେବାକୁ ଚେଷ୍ଟା କରିଥିଲେ, କିନ୍ତୁ ଆମର ନୀତି ଓ ସିଦ୍ଧାନ୍ତକୁ ଛଡ଼ାଇ ପାରିବେ ନାହିଁ। ଏହି ୪୦ ଧୋକେବାଜ ଦର୍ଶାଇଛନ୍ତି ଯେ ରାଜନୀତି କେତେ ମଇଳା ହୋଇପାରେ। ସେମାନେ ଯାହା କରିଛନ୍ତି ତାହା କେବଳ ଶିବସେନାର ନୁହେଁ ବରଂ ଗଣତନ୍ତ୍ର ପାଇଁ ପ୍ରତାରଣା। ସେ ଏକନାଥଙ୍କୁ କଟାକ୍ଷ କରି କହିଛନ୍ତି ଯେ ଯଦି ଆପଣ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଚାହାଁନ୍ତି, ତେବେ ଆପଣ ଇସ୍ତଫା ଦେଇ ମଇଦାନକୁ ଆସନ୍ତୁ |
ଆଦିତ୍ୟ ଠାକରେ କହିଛନ୍ତି ଯେ ଆମେ(ବିଜେପି-ଶିବସେନା) ଅଢେଇ ବର୍ଷର ଚୁକ୍ତି ବିଷୟରେ ଆଲୋଚନା କରିଥିଲୁ ଏବଂ ତାହା ହୋଇଥିଲେ ଆଜି ବିଜେପିର କେହି ମୁଖ୍ୟମନ୍ତ୍ରୀ ହୋଇଥାନ୍ତେ | କିନ୍ତୁ ତାହା ହୋଇନାହିଁ | ବିଜେପି ବଦଳରେ କଂଗ୍ରେସ ଏବଂ ଏନସିପି ଭଳି ଆମର ନୂଆ ବନ୍ଧୁମାନେ ସମ୍ପୂର୍ଣ୍ଣ ସମର୍ଥନ ଦେଇଛନ୍ତି।
Comments are closed.