ଭୁବନେଶ୍ୱର: ଆଜିଠୁ ରାଜ୍ୟରେ ଆରମ୍ଭ ହେଉଛି ବିଜୁ ଜନତା ଦଳର ଜନସମ୍ପର୍କ ପଦଯାତ୍ରା। ଭୁବନେଶ୍ୱରରୁ ଏହି କାର୍ଯ୍ୟକ୍ରମର ଶୁଭାରମ୍ଭ କରିବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ। ଦୀର୍ଘ ଏକ ମାସ ଧରି ଚାଲିବାକୁ ଥିବା ଏହି ଜନସମ୍ପର୍କ ଅଭିଯାନ ନଭେମ୍ବର ୨ ତାରିଖ ପର୍ଯ୍ୟନ୍ତ ଜାରି ରହିବ।
ଚଳିତବର୍ଷ ପଦଯାତ୍ରା ମାଧ୍ୟମରେ ତୃଣମୂଳ ସ୍ତରରେ ଦଳୀୟ ସଙ୍ଗଠନକୁ ସକ୍ରିୟ କରିବା ସହ ସରକାରଙ୍କ ବିଭିନ୍ନ ପ୍ରସଙ୍ଗକୁ ନେଇ ଲୋକଙ୍କ ନିକଟରେ ପହଞ୍ଚିବାକୁ ବିଜେଡି ଯୋଜନା କରିଛି। ବିଶେଷକରି ଡବଲ ଇଞ୍ଜିନ ସରକାରର ନୀତି ଓ କାର୍ଯ୍ୟକଳାପକୁ ନେଇ ଦଳ ଉଠାଇବାକୁ ଥିବା ପ୍ରସଙ୍ଗ ସହ ବିଜେଡି ସରକାର ସମୟର ବିଭିନ୍ନ ଯୋଜନା ଓ କାର୍ଯ୍ୟକ୍ରମକୁ ଲୋକଙ୍କ ସମ୍ମୁଖରେ ରଖିବାକୁ ରଣନୀତି ରହିଛି।
ପଦଯାତ୍ରାରେ ଏମ୍ଏମ୍ଡିଆର ସଂଶୋଧନ ବିଲ୍, ଆଇନଶୃଙ୍ଖଳା, କୃଷକଙ୍କ ସମସ୍ୟା ଓ ନାରୀ ନିର୍ଯାତନା ଭଳି ପ୍ରସଙ୍ଗକୁ ଗୁରୁତ୍ୱ ଦେବ ଦଳ। ଏହି ପ୍ରସଙ୍ଗଗୁଡ଼ିକୁ ନେଇ ଜନସାଧାରଣଙ୍କ ମଧ୍ୟରେ ଆଲୋଚନା ସୃଷ୍ଟି କରିବା ସହ ସରକାରଙ୍କ ନିକଟରେ ଦାବି ଓ ଆପତ୍ତି ରଖିବାକୁ ଦଳୀୟ ନେତୃତ୍ୱ ଯୋଜନା କରିଛି।
ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ରାଜ୍ୟର ୩୪ଟି ସାଙ୍ଗଠନିକ ଜିଲ୍ଲା ମୁଖ୍ୟାଳୟରେ ପଦଯାତ୍ରା ଆୟୋଜିତ ହେବ। ଏହା ସହ ପ୍ରତି ବ୍ଲକ୍, ପୌରପାଳିକା, ଏନ୍ଏସି ଓ ମହାନଗର ନିଗମ ଅଞ୍ଚଳରେ ମଧ୍ୟ ଦଳୀୟ କର୍ମୀ ଓ ନେତାମାନେ ଲୋକଙ୍କ ସହ ସମ୍ପର୍କ ସ୍ଥାପନ କରିବେ।
ପଦଯାତ୍ରା ଜରିଆରେ କେବଳ ରାଜନୈତିକ ପ୍ରସଙ୍ଗ ଉଠାଇବା ନୁହେଁ, ତୃଣମୂଳ ସ୍ତରରେ ଦଳୀୟ କର୍ମୀଙ୍କ ସହ ଯୋଗାଯୋଗ ବଢ଼ାଇବା ଏବଂ ସାଧାରଣ ଲୋକଙ୍କ ମତାମତ ଜାଣିବା ଉପରେ ମଧ୍ୟ ବିଜେଡି ଗୁରୁତ୍ୱ ଦେଉଛି। ଘରକୁ ଘର ଯାଇ ଲୋକଙ୍କ ସହ ଯୋଡ଼ିହେବା ମାଧ୍ୟମରେ ଦଳୀୟ ସଙ୍ଗଠନକୁ ଆହୁରି ସକ୍ରିୟ କରିବା ଲକ୍ଷ୍ୟ ରହିଛି।
ନଭେମ୍ବର ୨ ପର୍ଯ୍ୟନ୍ତ ଚାଲିବାକୁ ଥିବା ଏହି ଅଭିଯାନରେ ବିଜେଡି ରାଜ୍ୟର ବିଭିନ୍ନ ଅଞ୍ଚଳରେ ଜନସମ୍ପର୍କ ବଢ଼ାଇବା ସହ ନିଜ ରାଜନୈତିକ ଏଜେଣ୍ଡାକୁ ଲୋକଙ୍କ ନିକଟରେ ରଖିବ। ତୃଣମୂଳ ସ୍ତରରେ ଜନମତ ଗଠନ ଓ ଦଳୀୟ ସଙ୍ଗଠନକୁ ମଜବୁତ କରିବାକୁ ଏହି ପଦଯାତ୍ରାକୁ ଏକ ପ୍ରମୁଖ ରାଜନୈତିକ ଅଭିଯାନ ଭାବେ ଦଳ ପ୍ରସ୍ତୁତ କରିଛି।
