ଭୁବନେଶ୍ୱର: ଆଗାମୀ ଆଲୋକର ପର୍ବ ଦୀପାବଳିକୁ ଆନନ୍ଦ, ଉତ୍ସାହ ଏବଂ ସୁରକ୍ଷିତ ଭାବେ ପାଳନ କରିବା ପାଇଁ ଓଡ଼ିଶା ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ଆଜି ଏକ ସ୍ୱତନ୍ତ୍ର ମାର୍ଗଦର୍ଶିକା ଜାରି କରାଯାଇଛି। ପରିବେଶ ସୁରକ୍ଷା, ଶବ୍ଦ ପ୍ରଦୂଷଣ ନିୟନ୍ତ୍ରଣ ଏବଂ ସାଧାରଣ ଜନତାଙ୍କ ସୁରକ୍ଷାକୁ ସର୍ବାଧିକ ଗୁରୁତ୍ୱ ଦେଇ ଏହି ନୂତନ ନିୟମାବଳୀ ପ୍ରଣୟନ କରାଯାଇଛି। ଗାଇଡଲାଇନ ଅନୁଯାୟୀ, ଦୀପାବଳି ସନ୍ଧ୍ୟାରେ କେବଳ ସନ୍ଧ୍ୟା ୭ଟାରୁ ରାତି ୯ଟା ମଧ୍ୟରେ ବାଣ ଫୁଟାଇବାକୁ ଲୋକଙ୍କୁ ପରାମର୍ଶ ଦିଆଯାଇଛି ଏବଂ ରାତି ୯ଟା ପରେ ବାଣଫୁଟାଇବା ସମ୍ପୂର୍ଣ୍ଣ ବନ୍ଦ ରଖିବାକୁ କୁହାଯାଇଛି। ଉଦ୍ୟାନ, ପାର୍କ, ଚିକିତ୍ସାଳୟ, ଶିକ୍ଷାନୁଷ୍ଠାନ, ଆଦାଲତ ଏବଂ ଧାର୍ମିକ ସ୍ଥଳଗୁଡ଼ିକ ନିକଟରେ ବାଣ ଫୁଟାଇବା ଉପରେ ସମ୍ପୂର୍ଣ୍ଣ କଟକଣା ଜାରି କରାଯାଇଛି। କେବଳ ଖୋଲା ସ୍ଥାନରେ ସବୁଜ ବାଣ ଫୁଟାଇବାକୁ ଅନୁମତି ଦିଆଯାଇଥିବା ବେଳେ ଏହି ନିୟମର ଉଲ୍ଲଙ୍ଘନ କଲେ ଆଇନ୍ ଅନୁଯାୟୀ କଠୋର ଦଣ୍ଡବିଧାନ କରାଯିବ ବୋଲି ବୋର୍ଡ ପକ୍ଷରୁ ସ୍ପଷ୍ଟ କରାଯାଇଛି।
ବାଣ କିଣିବା ସମୟରେ ଗ୍ରାହକମାନେ ବିଶେଷ ସଚେତନତା ଅବଲମ୍ବନ କରିବାକୁ ଗାଇଡଲାଇନରେ କୁହାଯାଇଛି। ବାଣଟି ଅସଲି ଓ ସରକାରୀ ସଂସ୍ଥା ଦ୍ୱାରା ଅନୁମୋଦିତ କି ନୁହେଁ, ତାହା ଭଲଭାବେ ଯାଞ୍ଚ କରିବାକୁ ପରାମର୍ଶ ଦିଆଯାଇଛି। ବିଶେଷ କରି ବାଣ ପ୍ୟାକେଟରେ ନିର୍ଦ୍ଧାରିତ ପ୍ରମାଣପତ୍ରର ଚିହ୍ନ ଏବଂ ପ୍ରତିକ୍ରିୟା ସୂଚକ ସାଙ୍କେତିକ କୋଡ୍ ରହିଛି କି ନାହିଁ, ତାହା ଦେଖି କିଣିବାକୁ କୁହାଯାଇଛି। ବାଣ ତିଆରିରେ ବାରିୟମ ଭଳି କ୍ଷତିକାରକ ଓ ନିଷିଦ୍ଧ ରାସାୟନିକ ପଦାର୍ଥର ବ୍ୟବହାର ଉପରେ ସମ୍ପୂର୍ଣ୍ଣ କଟକଣା ଲଗାଯାଇଛି। ଏହା ସହିତ ପ୍ରଚଣ୍ଡ ଶବ୍ଦ ସୃଷ୍ଟି କରୁଥିବା ବାଣ ନ ଫୁଟାଇବା ପାଇଁ ଜନସାଧାରଣଙ୍କୁ ନିବେଦନ କରାଯାଇଛି।
ସୁରକ୍ଷା ଦୃଷ୍ଟିରୁ ଛୋଟ ପିଲାମାନେ ଯେତେବେଳେ ବାଣ ଫୁଟାଇବେ, ସେତେବେଳେ ନିଜେ ବଡ଼ମାନେ ଉପସ୍ଥିତ ରହି ସେମାନଙ୍କ ଉପରେ କଡ଼ା ନଜର ରଖିବାକୁ ପରାମର୍ଶ ଦିଆଯାଇଛି। ଯଦି କୌଣସି ବାଣ ଥରେ ନିଆଁ ଲଗାଇବା ପରେ ଫୁଟି ନ ଥାଏ, ତେବେ ତାହାକୁ ପୁଣି ଥରେ ଜଳାଇବାକୁ ଚେଷ୍ଟା ନ କରିବାକୁ ସଚେତନ କରାଯାଇଛି, କାରଣ ଏହାଦ୍ୱାରା ବଡ଼ ଧରଣର ଦୁର୍ଘଟଣା ଘଟିବାର ଯଥେଷ୍ଟ ଆଶଙ୍କା ଥାଏ। ନିଜର ଖୁସି ଯେପରି ଅନ୍ୟ କାହା ପାଇଁ ଅସୁବିଧା କିମ୍ବା ବିପଦର କାରଣ ନ ହୁଏ, ସେଥିପ୍ରତି ପ୍ରତ୍ୟେକ ନାଗରିକ ଦାୟିତ୍ୱବାନ ହେବାକୁ ବୋର୍ଡ ନିବେଦନ କରିଛି।
