ମୁମ୍ବାଇ: ମୁଖ୍ୟ ନିର୍ବାଚନ କମିଶନର (ସିଇସି) ଜ୍ଞାନେଶ କୁମାରଙ୍କ ବିରୋଧରେ ଚାଲିଥିବା ପ୍ରତିବାଦକୁ ସମର୍ଥନ ଜଣାଇ ମୁମ୍ବାଇରେ ୪୦୦ରୁ ଅଧିକ ପ୍ରଦର୍ଶନକାରୀଙ୍କୁ ପୁଲିସ ଅଟକ ରଖିଛି। ଅଟକ ରଖାଯାଇଥିବା ଲୋକଙ୍କ ମଧ୍ୟରେ ଅଭିନେତା ଇମ୍ରାନ ଖାନ ମଧ୍ୟ ରହିଥିବା ଜଣାପଡ଼ିଛି। ଦିଲ୍ଲୀରେ କୋକ୍ରୋଚ୍ ଜନତା ପାର୍ଟି (ସିଜେପି) ପକ୍ଷରୁ ହୋଇଥିବା ପ୍ରତିବାଦକୁ ସମର୍ଥନ ଜଣାଇ ମୁମ୍ବାଇରେ ଏହି ଆନ୍ଦୋଳନ କରାଯାଇଥିଲା। ଏଥିରେ ସାମାଜିକ କର୍ମୀ ତୁଷାର ଗାନ୍ଧୀଙ୍କ ନେତୃତ୍ୱାଧୀନ ସଂଗଠନ ‘ହମ୍ ଭାରତ କେ ଲୋଗ୍’ର ସଦସ୍ୟ ଏବଂ ଭାରତୀୟ କମ୍ୟୁନିଷ୍ଟ ପାର୍ଟି (ମାର୍କ୍ସବାଦୀ)ର ସମର୍ଥକମାନେ ସାମିଲ ହୋଇଥିଲେ। ଦିନର ପ୍ରାରମ୍ଭରେ ଅଗଷ୍ଟ କ୍ରାନ୍ତି ମଇଦାନରୁ ଅନ୍ୟୂନ ୨୦୦ ଜଣଙ୍କୁ ଅଟକ ରଖାଯାଇଥିଲା।
ସୂତ୍ରରୁ ଜଣାପଡ଼ିଛି ଯେ, ଅଟକ ଥିବା ପ୍ରଦର୍ଶନକାରୀଙ୍କ ବିରୋଧରେ ଏତଲା (ଏଫ୍ଆଇଆର୍) ରୁଜୁ କରିବା ପ୍ରକ୍ରିୟା ଚାଲିଛି। ତେବେ ଏହି ଘଟଣାକୁ ନେଇ ପ୍ରତିବାଦକାରୀଙ୍କ ମଧ୍ୟରେ ଅସନ୍ତୋଷ ବଢ଼ିଥିବା ଦେଖାଯାଇଛି।ଅନ୍ୟପକ୍ଷରେ, ଦକ୍ଷିଣ ମୁମ୍ବାଇର ହୁତାତ୍ମା ଚୌକ ନିକଟରେ ସିଜେପିକୁ ସମର୍ଥନ ଜଣାଇ ପ୍ରତିବାଦ କରୁଥିବା ବଞ୍ଚିତ ବହୁଜନ ଆଘାଡ଼ି (ଭିବିଏ)ର କର୍ମୀମାନଙ୍କୁ ମଧ୍ୟ ପୁଲିସ ଅଟକ ରଖିଛି। ଏହି ସଂଗଠନର ନେତୃତ୍ୱ ପ୍ରକାଶ ଆମ୍ବେଦକର ନେଉଛନ୍ତି। ପ୍ରତିବାଦକାରୀ ରୁବୈଦ ଭୋଜାନି ପୁଲିସର କାର୍ଯ୍ୟାନୁଷ୍ଠାନକୁ ନେଇ ଅସନ୍ତୋଷ ପ୍ରକାଶ କରିବା ସହ ପ୍ରଦର୍ଶନକାରୀଙ୍କୁ ଅତ୍ୟନ୍ତ କଠୋର ଭାବେ ଅଟକ ରଖାଯାଇଥିବା ଅଭିଯୋଗ କରିଛନ୍ତି।ଭୋଜାନି କହିଛନ୍ତି ଯେ, ସେମାନେ ପ୍ରଧାନମନ୍ତ୍ରୀଙ୍କୁ ଭୋଟ୍ ଦେଇଥିଲେ, କିନ୍ତୁ ଏବେ ନିଜକୁ ପ୍ରତାରିତ ମନେ କରୁଛନ୍ତି। ଏଥିସହ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା ଦାବି କରିଛନ୍ତି।
ଏହି ଘଟଣାକ୍ରମରେ ସାମାଜିକ କର୍ମୀ ତୁଷାର ଗାନ୍ଧୀଙ୍କୁ ମଧ୍ୟ ବାନ୍ଦ୍ରା ଅଞ୍ଚଳରୁ ପୁଲିସ ନିଜ ହେପାଜତକୁ ନେଇ ଡିଏନ୍ ନଗର ଥାନାକୁ ନେଇଥିଲା। ତାଙ୍କୁ ଅଟକ ରଖାଯିବା ଖବର ପ୍ରଚାର ହେବା ପରେ ଥାନା ବାହାରେ ବହୁ ସଂଖ୍ୟାରେ ଲୋକ ଏକାଠି ହୋଇଥିଲେ। ଶିବସେନା (ୟୁବିଟି) ନେତା ଆଦିତ୍ୟ ଠାକରେ ମଧ୍ୟ ସେଠାରେ ପହଞ୍ଚିଥିଲେ।
ଅଗଷ୍ଟ କ୍ରାନ୍ତି ମଇଦାନରେ ଅପରାହ୍ନ ୩ଟା ୩୦ରେ ପ୍ରତିବାଦ ସଭା ଆୟୋଜନ ପାଇଁ ତୁଷାର ଗାନ୍ଧୀ ସୋସିଆଲ୍ ମିଡିଆ ପ୍ଲାଟଫର୍ମ ‘ଏକ୍ସ’ରେ ଏକ ପୋଷ୍ଟ କରି ନାଗରିକମାନଙ୍କୁ ଯୋଗଦେବାକୁ ଆହ୍ୱାନ କରିଥିଲେ। ସେହିପରି କର୍ମୀ ଫିରୋଜ ମିଠିବୋରୱାଲାଙ୍କୁ ମଧ୍ୟ ତାଙ୍କ ବାସଭବନରୁ ହେପାଜତକୁ ନିଆଯାଇ ଏମ୍ଆଇଡିସି ପୁଲିସ ଷ୍ଟେସନକୁ ସ୍ଥାନାନ୍ତର କରାଯାଇଥିଲା।ମୁଖ୍ୟ ନିର୍ବାଚନ କମିଶନରଙ୍କ ବିରୋଧରେ ପ୍ରତିବାଦ, ବିଭିନ୍ନ ରାଜନୈତିକ ଓ ସାମାଜିକ ସଂଗଠନର ସମର୍ଥନ ଏବଂ ପୁଲିସର ଅଟକ କାର୍ଯ୍ୟାନୁଷ୍ଠାନକୁ ନେଇ ମୁମ୍ବାଇରେ ରାଜନୈତିକ ମାହୋଲ ସରଗରମ ହୋଇଛି।
