ଭୁବନେଶ୍ୱର : ରାଜ୍ୟରେ ସମ୍ଭାବ୍ୟ ଲଘୁଚାପ ଜନିତ ପ୍ରବଳ ବର୍ଷାକୁ ନେଇ ପାଣିପାଗ ବିଭାଗ ସତର୍କ ସୂଚନା ଜାରି କରିଥିବାବେଳେ, ଏହାର ମୁକାବିଲା ପାଇଁ ଓଡ଼ିଶା ଅଗ୍ନିଶମ ଓ ଜରୁରୀକାଳୀନ ସେବା ବିଭାଗ ସମ୍ପୂର୍ଣ୍ଣ ପ୍ରସ୍ତୁତ ରହିଛି। ଅଗ୍ନିଶମ ସେବା ମହାନିର୍ଦ୍ଦେଶକ ସୁଧାଂଶୁ ଷଡ଼ଙ୍ଗୀଙ୍କ ନିର୍ଦ୍ଦେଶକ୍ରମେ ଆଇଜି ଉମାଶଙ୍କର ଦାଶ ଏକ ସମୀକ୍ଷା ବୈଠକ କରି ରାଜ୍ୟର ସମସ୍ତ ଉଦ୍ଧାରକାରୀ ଦଳକୁ ‘ହାଇଆଲର୍ଟ’ରେ ରହିବାକୁ ନିର୍ଦ୍ଦେଶ ଦେଇଛନ୍ତି।ରାଜ୍ୟର ସମସ୍ତ ଅଗ୍ନିଶମ କେନ୍ଦ୍ରକୁ ୨୪ ଘଣ୍ଟିଆ କାର୍ଯ୍ୟକ୍ଷମ ରଖାଯାଇଥିବାବେଳେ, ପ୍ରତ୍ୟେକ ଜିଲ୍ଲା ପ୍ରଶାସନ ସହ ସମନ୍ୱୟ ରକ୍ଷା କରି ଯେକୌଣସି ଜରୁରୀ ପରିସ୍ଥିତିରେ ତୁରନ୍ତ ଉଦ୍ଧାର ଓ ସହାୟତା କାର୍ଯ୍ୟ କରିବାକୁ ବିଭାଗ ପ୍ରସ୍ତୁତ ରହିଛି। ଏଥିପାଇଁ ୨୪ ଘଣ୍ଟିଆ କଣ୍ଟ୍ରୋଲ ରୁମ୍ ମଧ୍ୟ ସକ୍ରିୟ କରାଯାଇଛି।ବନ୍ୟା ପରିସ୍ଥିତିରେ ଉଦ୍ଧାର କାର୍ଯ୍ୟ ପାଇଁ ୩୨୪ଟି ମୋଟରଚାଳିତ ରବର ବୋଟ୍, ୩,୧୪୩ଟି ଲାଇଫ୍ ଜାକେଟ୍ ଓ ୨,୭୧୨ଟି ଲାଇଫ୍ ବୁୟେ ପ୍ରସ୍ତୁତ ରଖାଯାଇଛି। ସେହିପରି ଜଳମଗ୍ନ ତଳିଆ ଅଞ୍ଚଳରୁ ପାଣି ନିଷ୍କାସନ ପାଇଁ ୯୫୨ଟି ହାଇ-କ୍ୟାପାସିଟି ଓ ପୋର୍ଟେବଲ୍ ପମ୍ପ କାର୍ଯ୍ୟକ୍ଷମ ଅବସ୍ଥାରେ ରହିଛି।ଝଡ଼ ଓ ବର୍ଷା ଯୋଗୁଁ ଗଛ ଉପୁଡ଼ିବା କିମ୍ବା କୋଠାବାଡ଼ି କ୍ଷତିଗ୍ରସ୍ତ ହେବା ପରି ସ୍ଥିତିର ମୁକାବିଲା ପାଇଁ ୧,୫୫୧ଟି ଚେନ୍-ସ’ ଓ ଅତ୍ୟାଧୁନିକ ହାଇଡ୍ରୋଲିକ୍ ରେସକ୍ୟୁ ଟୁଲ୍ସ ମହଜୁଦ ରଖାଯାଇଛି। ରାତ୍ରିକାଳୀନ ଉଦ୍ଧାର କାର୍ଯ୍ୟକୁ ସୁଗମ କରିବା ପାଇଁ ୬୨୮ଟି ଟାୱାର ଲାଇଟ୍ ମଧ୍ୟ ବ୍ୟବସ୍ଥା କରାଯାଇଛି।ପ୍ରବଳ ବର୍ଷା ଓ ବନ୍ୟା ଜନିତ ଯେକୌଣସି ବିପର୍ଯ୍ୟୟରେ ତୁରନ୍ତ ପ୍ରତିକ୍ରିୟା ଦେବା ସହ ଲୋକଙ୍କ ଜୀବନ ଓ ସମ୍ପତ୍ତିର ସୁରକ୍ଷାକୁ ସର୍ବାଧିକ ପ୍ରାଥମିକତା ଦେଇ ଅଗ୍ନିଶମ ବିଭାଗ ସମସ୍ତ ପ୍ରକାର ପ୍ରସ୍ତୁତି ଶେଷ କରିଥିବା ସୂଚନା ମିଳିଛି।
Comments are closed.