ସାରେ ଯହାଁ ସେ ଅଚ୍ଛା

ସାରେ ଯହାଁ ସେ ଅଚ୍ଛା
=============
ବିଧାତା ସୃଜିଲେ ଏ ଧରଣୀ ବକ୍ଷେ
ଯେତୋଟି ମନୁଷ୍ୟ ବାସ l
ସବୁଠୁ ସୁନ୍ଦର ତା ମଧ୍ୟେ ମୋହର
ଦେଶ ଏ ଭାରତ ବର୍ଷ ll
ଦେବତା ଇଚ୍ଛନ୍ତି ଜନମ ନେବାକୁ
ପୂତ ଭୂମି ଏ ଭାରତେ l
ଶୁଭ୍ର ଶୈଳଶ୍ରେଣୀ ହିମାଳୟ ଯାର
ଶିରେ ମୁକୁଟ ପ୍ରକଟେ ll
ଭୁସ୍ୱର୍ଗ କାଶ୍ମିର ତା ମସ୍ତକେ ମଣି
ପାଦ ପଖାଳେ ଜଳଧି l
ବକ୍ଷରେ ତାହାର ବିନ୍ଧ୍ୟ ଗିରି ବର
ଗଙ୍ଗା ଗୋଦାବରୀ ନଦୀ ll
ସତ୍ୟ ଓ ଅହିଂସା ମୁଳ ମନ୍ତ୍ର ଯାର
ବେଦ ପୁରାଣ ବଖାଣେ l
ଜଗତେ ଏପରି ଦେଶଟିଏ ଅଛି
ଦେଖିଛ କି କାହିଁ ଜଣେ ll
ଆର୍ଯ୍ୟାବର୍ତ୍ତ ଦେବ ଭୂମି ଏ ଭାରତ
ମୁନି ଋଷି ବାକ୍ୟେ ପୂତ l
ବକ୍ଷେ ବହେ ଯାର ପୂତ ନୀର ଧାର
କୃଷ୍ଣା, ସିନ୍ଧୁ, ବ୍ରହ୍ମପୁତ୍ର ll
ସୂରୁଜ ଉଇଁଲେ ପ୍ରଥମ କିରଣେ
ଦେଖନ୍ତି ମାଆର ମୁଖ l
ତାରା ଗଣ ଖଚି ରତ୍ନର ଚାନ୍ଦୁଆ
ଢାଙ୍କନ୍ତି ଚନ୍ଦ୍ର ମୟୂଖ ll
ଯେ ଭୂମି ପ୍ରଚାରେ ପ୍ରେମର ରାଗିଣୀ
ବିଶ୍ୱ ଭ୍ରାତୃତ୍ୱର ବାଣୀ l
ସର୍ବେ ଆମ୍ଭେ ବସୁଧୈବ କୁଟୁମ୍ବକମ୍
ବିଶ୍ୱର ଭାଈ ଭଉଣୀ ll
ବିଶ୍ୱରେ ବୃହତ ଗଣତନ୍ତ୍ର ଯାର
ଶାସନ ପ୍ରଜା ତନ୍ତର l
ରାମରାଜ୍ୟେ ପ୍ରଭୁ ପ୍ରଜାନୁରଞ୍ଜନ
ପ୍ରଚାର ମହା ମନ୍ତର ll
ସେ ପବିତ୍ର ଭୂମେ ଆନନ୍ଦେ ଵିହରୁ
ଆମ୍ଭେ ସର୍ବେ ଦେଶ ବାସୀ l
ଯେ ଭୂମେ ବିରାଜେ ପୁଣ୍ୟ ତୀର୍ଥ
ଯଥା ଦ୍ୱାରିକା ମଥୁରା କାଶୀ ll
ଆଜି ସେ ମହାନ ପରବ ଆମର
ଜାନୁଆରୀ ଛବିଶର l
ସଗର୍ବେ ଉଡ଼ାଅ ତିନି ରଙ୍ଗିଆକୁ
ମାଆର ବନ୍ଦନା କର ll
ଜାତୀୟ ପତାକା ଆମରି ତ୍ରିରଙ୍ଗା
ଆମ ଗୌରବ ବ୍ୟଞ୍ଜକ l
ସେ ପତାକା ତଳେ ଆସ ଆସ ସର୍ବେ
ହୋଇଯିବା ଆମେ ଏକ ll
ପ୍ରାର୍ଥନା କରିବା ଆମରି ଗୌରବ
ବିଶ୍ୱେ ରହିଥାଉ ଟେକ l
ବନ୍ଦେ ମାତରଂ ଜୟ ହିନ୍ଦ ମାଆ
ପଦେ ନୁଆଁଏ ମସ୍ତକ,
ପଦେ ନୁଆଁଏ ମସ୍ତକ ll
🙏🙏🙏
ଅର୍ଜୁନୀ
————-
ଅର୍ଜୁନୀ ଚରଣ ବେହେରା
ମୋ – 7693091971