ଅଜିତ୍ ପାୱାରଙ୍କ ଦୁର୍ଘଟଣା ପଛରେ ଯାନ୍ତ୍ରିକ ତ୍ରୁଟି ନା ପାଇଲଟଙ୍କ ଭୁଲ

ମୁମ୍ବାଇ : ମହାରାଷ୍ଟ୍ର ଉପ-ମୁଖ୍ୟମନ୍ତ୍ରୀ ଅଜିତ୍ ପାୱାରଙ୍କ ମୃତ୍ୟୁ ପରେ ଏବେ ସବୁଠାରୁ ବଡ଼ ପ୍ରଶ୍ନ ହେଉଛି  କେମିତି ହେଲା ଏହି ଭୟଙ୍କର ଦୁର୍ଘଟଣା ? ପ୍ରତ୍ୟକ୍ଷଦର୍ଶୀ ଏବଂ ପ୍ରାଥମିକ ତଦନ୍ତ ରିପୋର୍ଟରୁ ମିଳିଥିବା ତଥ୍ୟ ଅନୁଯାୟୀ, ଦୁର୍ଘଟଣା ପୂର୍ବରୁ ବିମାନଟି ରନୱେର ମାତ୍ର ୧୦୦ ଫୁଟ୍ ଉପରେ ଥିଲା। ବାରାମତି ବିମାନବନ୍ଦର ନିକଟରେ ଥିବା ଜଣେ ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ଅଜିତ୍ ପାୱାରଙ୍କ ଲିୟରଜେଟ୍ ୪୫ (Learjet 45) ବିମାନଟି ଅବତରଣ କରିବା ପୂର୍ବରୁ ଆକାଶରେ କିଛି ସମୟ ଘୂରି ବୁଲିଥିଲା। ବିମାନର ଇଞ୍ଜିନରୁ ଅସ୍ୱାଭାବିକ ଶବ୍ଦ ଶୁଣାଯାଉଥିଲା ଏବଂ ସେଥିରୁ ଧୂଆଁ ବାହାରୁଥିବା ଦେଖାଯାଇଥିଲା।  ରନୱେରୁ ପ୍ରାୟ ୧୦୦ ଫୁଟ୍ ଉପରେ ଥିବା ସମୟରେ ବିମାନଟି ହଠାତ୍ ନିୟନ୍ତ୍ରଣ ହରାଇ ସିଧା ତଳକୁ ଖସି ପଡ଼ିଥିଲା। ମାଟିରେ  ପିଟି ହେବା ମାତ୍ରେ ଏକ ବଡ଼ ଧରଣର ବିସ୍ଫୋରଣ ହୋଇଥିଲା ଏବଂ ପୂରା ବିମାନଟି ନିଆଁ ଗୋଳାରେ ପରିଣତ ହୋଇଯାଇଥିଲା।

ଡିଜିସିଏ (DGCA) ପକ୍ଷରୁ କୁହାଯାଇଛି ଯେ ଦୁର୍ଘଟଣାର ପ୍ରକୃତ କାରଣ ଖୋଜିବା ପାଇଁ ତଦନ୍ତ ଜାରି ରହିଛି। ତେବେ କିଛି ସମ୍ଭାବ୍ୟ କାରଣ ସାମ୍ନାକୁ ଆସୁଛି , ବିମାନର ଇଞ୍ଜିନରେ କିଛି ଗଡ଼ବଡ଼ ଥିବା ଅନୁମାନ କରାଯାଉଛି, ଯେଉଁଥିପାଇଁ ଲ୍ୟାଣ୍ଡିଂ ସମୟରେ ଏହା ସନ୍ତୁଳନ ହରାଇଥିଲା। ଫ୍ଲାଇଟ୍ ଟ୍ରାକିଂ ଡାଟା ଅନୁଯାୟୀ, ବିମାନଟି ପ୍ରଥମ ଥର ଅବତରଣ କରିବାରେ ବିଫଳ ହୋଇଥିଲା ଏବଂ ଦ୍ୱିତୀୟ ଥର ଚେଷ୍ଟା କରୁଥିବା ବେଳେ ଏହି ଅଘଟଣ ଘଟିଥିଲା।  କୁହାଯାଉଛି ଯେ ଅବତରଣ ସମୟରେ ବିମାନର ଚକ (Landing Gear) ଠିକ୍ ଭାବେ କାମ କରିନଥାଇ ପାରେ।

ବିମାନ ବିଷୟରେ କିଛି ତଥ୍ୟ:

• ମଡେଲ: Learjet 45XR (VT-SSK)

• ମାଲିକାନା: VSR Ventures Pvt Ltd

• ରେକର୍ଡ: ସୂଚନାଯୋଗ୍ୟ ଯେ, ଏହି କମ୍ପାନୀର ଏକ ବିମାନ ୨୦୨୩ ମସିହାରେ ମଧ୍ୟ ଏକ ଛୋଟ ଦୁର୍ଘଟଣାର ସମ୍ମୁଖୀନ ହୋଇଥିଲା।

  କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ପକ୍ଷରୁ AAIB (Aircraft Accident Investigation Bureau) କୁ ଏହି ଘଟଣାର ଯାଞ୍ଚ ଦାୟିତ୍ୱ ଦିଆଯାଇଛି। ବିମାନର ‘ବ୍ଲାକ୍ ବକ୍ସ’ (Black Box) ମିଳିବା ପରେ ହିଁ ସ୍ପଷ୍ଟ ହେବ ଯେ ଶେଷ ମୁହୂର୍ତ୍ତରେ କକ୍‌ପିଟ୍‌ରେ କଣ କଥାବାର୍ତ୍ତା ହୋଇଥିଲା ଏବଂ ପ୍ରକୃତ ସମସ୍ୟା କଣ ଥିଲା।